Gipasakaan og mga kaso ni Regional Director Victor Caindec sa Land Transportation Office (LTO-7) ang mga tag-iya sa duha ka dagkong dealers sa motorsiklo sa Visayas ug Mindanao gumikan sa giingong malimbungon nga paagi sa ilang pagpamaligya.
Moabot ngadto sa siyam ka mga kaso ang gisang-at batok sa Des Marketing samtang ang upat gipasaka batok sa Du Ek Sam nga kalapasan sa Section 4 sa Republic Act 11235 kun Motorcycle Crime Prevention Act.
Ang kaso gipasaka ni Caindec batok sa tag-iya ug mga opisyal sa korporasyon nga silang Marvin Ken Du, Ryan Lim, Iwih Jane Du, Louise Camille Lumapas, Henry Batalan, ug Aldren Acosta.
Ang labing taas nga opisyal sa LTO-7 niingon nga kini maoy labing unang kaso nga gipasaka sa tibuok Pilipinas ilawom sa Motorcycle Crime Prevention Act.
“Failure of the owner to register within five days from the acquisition of ownership, or to immediately report its sale or disposition, shall subject the owner to a penalty of imprisonment or arresto mayor to prison correccional, as defined under the Revised Penal Code, or fine of not less than Twenty thousand pesos (P20,000) but not more than Fifty thousand pesos (P50,000) or both,” natala sa reklamo ni Caindec.
Walo ka mga kaso gisang-at sa Mandaue City Prosecutor’s Office ug ang lima ka mga kaso gisang-at didto sa Cebu City Prosecutor’s Office.
Pipila na ka adlaw ang nakalabay, si Assistant Secretary Jayart Tugade, pangulo sa LTO, subling nipahinumdom sa mga dealer nga sundon ang nalatid sa Section 4 sa RA 11235 aron dili mapahamtangan og silot.
Ang pagkahalin sa motorsiklo gikan sa dealer kinahanglan nga maduso na ngadto sa LTO office tulo ngadto sa lima ka adlaw samtang sa mga sakyanan nga upat ang ligid pataas gitagaan sila og pito ngadto sa 11 ka adlaw subay sa balaod aron ma-release na ang OR ug CR.
Gawas sa 13 ka mga kaso, gipadayag ni Caindec nga aduna pay kapin 200 ka mga dokumento nga iyang gihuptan ug sa mosunod nga mga adlaw o semana, sa higayon nga makumpleto na, iya na usab kini nga isang-at ngadto sa piskaliya.