Patay ang usa ka 28 anyos nga lalaki nga nagmaneho sa iyang motorsiklo human madasmagi sa sports utility vehicle (SUV) nga mi counterflow sa 11:59 sa Lunes sa tungang gabii sa Pebrero 6, 2023 sa Governor Cuenco Avenue, Barangay Kasambagan, dakbayan sa Sugbo.
Ang biktima giila nga si Paul John Cuadra Narciso, Angkas driver, taga Upper Casili, siyudad sa Mandaue, kinsa nag-drive sa iyang Honda Wave nga motorsiklo padung sa dakbayan sa Sugbo.
Sa imbestigasyon sa Mabolo Police Station, nga samtang nagsubay ang biktima sa maong dalan iyang nakasugat ang mi-counterflow nga KIA Sorento nga dunay plate number YCM 399 ug nahitabo ang head-on collision.
Tungod sa kakusog sa dagan sa SUV, nalagpot ang biktima ug nabundak sa sementadong karsada hinungdan sa iyang hinanali nga kamatayon.
Gituohan nga nakainom ang driver sa SUV nga si Jose Maria Nuñez Bernedo, 50, taga 4TH Paradise Village, Kasambagan.
Kasamtangan nga gi-detain sa Mabolo police station si Bernedo samtang gihikay na ang kasong reckless imprudence resulting in homicide and damage to property.
Si Police Major Eraño Regidor, hepe sa Mabolo Police Station, niawhag sa mga nagmaneho sa sakyanan nga dili momaneho kon nakainom ug kon katulogon na, mohunong una, mopadaplin ug mopiyong makadali aron malikayan ang disgrasya.
Sa migawas sa imbestigasyon sa traffic investigator sa Mabolo police station, giingong sad-an ang SUV tungod kay mikawat sa laing linya sa karsada.