Usa ka babaye nga giingong nagtanyag og pornography nga naglambigit sa iyang mga igsuon, lakip ang 16-anyos nga menor de edad, ngadto sa mga langyaw online, nasikop sa National Bureau of Investigation Central Visayas (NBI-7) human sa entrapment operation.
Ang nasikop mao si Claire, dili tinuod nga ngan, 25, lumolupyo sa Barangay Tisa, dakbayan sa Sugbo.
Si Señior Agent Niño Rodriguez, imbestigador sa kaso, niingon sa Martes, Pebrero 7, 2023, pinaagi sa press conference nga ang suspek nasikop niadtong Enero 31.
Sumala pa ni Rodriguez nga una nilang nahibaw-an ang online modus sa suspek dihang nihimo sila og random cyber patrol gamit ang undercover nga Facebook account nga adunay profile nga langyaw.
Giingong nakig-estorya ang suspek, dayon nangayo og kuwarta aron ipalit og pagkaon ug cellphone load bugti sa ilang hubo nga mga hulagway niya ug sa iyang duha ka mga igsuon nga nag-edad og 20 ug 16.
Dugang pa niya nga nitanyag si Claire og “cam show” uban sa iyang mga igsuon kon mobayad sila og dugang kuwarta.
Dinhi si Rodriguez niingon nga nilusad og entrapment operation ang NBI ngadto sa suspek ug naluwas ang menor de edad nga igsuon niini.
Apan pag-abot nila sa balay ni Claire, si Rodriguez niingon nga ilang nahibaw-an nga ang iyang 16-anyos nga igsuong babaye naluwas na sa Department of Social Welfare and Development (DSWD) ug kasamtangang gipapuyo sa usa ka shelter sa Minglanilla.
Matud ni Rodriguez nga nakadawat ang ahensya og report gikan sa langyaw nga law enforcement agency sa mga hubo nga litrato sa menor de edad nga nag-viral na sa pipila ka international social media sites.
Sa sworn statement nga gisumitir niadtong Pebrero 1, ang menor de edad mikompirmar nga siya ang naa sa mga hulagway ug siya ug ang iyang 20-anyos nga igsuon positibong miila kang Claire nga ilang magulang.
MI-DENY
Sa buwag nga pakighinabi, gihimakak sa suspek ang mga alegasyon nga nakiglambigit siya sa iyang mga igsuon sa sexual acts online.
“Wala man silay labot ako raman,” ni Claire.
Matud niya nga iyang gihimo ang krimen isip paagi sa panginabuhi.
Giangkon ni Claire nga gikan sa P300 hangtod sa P1,500 ang iyang mga transaksyon, diin ang mga mahal niini naglakip sa “cam show.”
Siya niingon nga ang tanan nga mga transaksyon pinaagi sa micro-payment service G-cash.
Matud ni Claire nga taudtaod na niyang gihimo ang maong ilegal nga kalihokan ug nihunong apan nibalik sa pagbuhat niini karong tuiga.
Sa miaging semana niadtong Pebrero 2, si Claire gipasakaan og kasong kalapasan sa Qualified Trafficking in Persons ubos sa section 4 in relation to section 6 sa Republic Act 11862 o ang Expanded Anti-Trafficking in Persons Act of 2022.
Dugang ni Rodriguez nga ila usab nga tun-an kon mapasakaan usab og kaso ang 20 anyos nga igsuon ni Claire.
Dugang pa niya nga aduna siyay live-in partner apan ang naulahi mihimakak nga duna siyay kasayuran sa iyang mga transaksyon. Si Arnel Pura, NBI Mandaue Office agent-in-charge, niawhag sa publiko sa pagtaho sa bisan unsang impormasyon nga ilang nahibaw-an nga naglambigit sa cybersex activities ug tabangan ang NBI sa pagpakigbatok niini.