NAGPLANO ang Davao City Agriculturist Office (Cagro) nga magpalapad sa organic farmers market kun hatagan sila og dugang espasyo.
"Kung naa tay area, seguro kung naay mall nga mag-offer nga malibre sila didto," tug-an ni Edgardo Haspe, Cagro Head sa pinakalit nga paghinabi kaniya uban sa SunStar Davao niadtong Pebrero 6, 2023.
Matud niya nga sulayan nilang magpalapad sa organic market sa Nobyembre, kon diin national organic month.
"We can also ask mga malls nato diri sa Davao nga kung pwede magbutang sila og area nga maka-display atong mga organic practitioners didto sa ilang mga produkto," tin-aw ni Haspe.
Samtang samtang ang lokal nga panggamhanan sa Davao nagpadayon sa pagpakusog sa promosyon sa organic farming, matud ni Haspe nga ang Cagro nagpadayon sa paghanyag og pagbansay sa mga interesado nga mga indibiduwal ug mga organic nga mag-uuma.
Mohatag sab sila og mga liso ug organic fertilizers ngadto sa mga buot nga magsugot og organic farming.
"Although right now, limited pa atong organic fertilizer but naa ta’y gina-produce nga vermicast didto sa Malagos central nursery," tin-aw niya.
Dugang niya nga kung ang compost machine nga naa sa Malagos hingpit nang operasyonal, ang ilang maprodyus nga fertilizer ihatag ngadto sa mga organic farmers.
"Ang kulang naman lang ato kay kuryente kay di siya mapadagan. So, within this year naa na gyud na, mga third quarter this year," tin-aw niya. (KSD)