Aduna na’y bag-ong hari sa hinakutay og puntos sa tanang panahon sa National Basketball Association (NBA)... si LeBron James.
Nahitabo kini kagahapon, Pebrero 8, 2023 (PH time) atol sa kapildihan sa host Los Angeles Lakers batok sa Oklahoma City Thunder, 133-130.
Pinaagi sa stepback jumpshot sa nahabiling 10.9 segundos sa 3rd quarter, narehistro ni James ang iyang ika-38,388 puntos sa kinatibuk-an aron buakon ang rekord ni Lakers legend Kareem Abdul-Jabbar nga nagbarog sulod sa dul-an upat ka mga dekada.
Gihunong una ang duwa aron dalitan og rekognasyon ang kanhi four-time MVP sa iyang talagsaon ug makasaysayong naabot.
Si Abdul-Jabbar nibarog sa iyang lingkuranan ug nipakpak.
Atol sa hamubong seremonya, nakig-uban ni James ang pipila sa mga sakop sa iyang pamilya lakip na ang iyang inahan, asawa ug mga anak.
Dihang naposte ni Abdul-Jabbar ang kanhi all-time scoring record nga 38,387 niadtong Abril 5, 1984, gituohan nga magpabilin kini hangtod sa kahangturan.
Pipila lang ang nakaduol og gamay niini.
Si Karl Malone kuwangan og 1,450 puntos aron mabuak ang rekord ni Abdul-Jabar, si Kobe Bryant kuwangan og 4,744 puntos samtang si Michael Jordan kuwangan og 6,095 puntos.
Silang tanan nalabwan ni James dayon si Abdul-Jabbar. Nahimo kini ni James sa iyang ika-20 ka tuig sa liga, samang gidaghanon sa pagduwa ni Abdul-Jabbar una kini niretiro.
“A record that has stood for nearly 40 years, which many people thought would never be broken,” matod ni NBA Commissioner Adam Silver.
Si Abdul-Jabbar nigunit og bola ug iya kining gipasa ngadto kang James atol sa ceremonial passing of the torch. Nagpahulagway sila kauban si Silver.
Nakahilak si James ug human niya napahiran ang iyang mga luha, nibuhi na siya og pamahayag.
“I just want to say, thank you to the Laker faithful. You guys are one of a kind,” matod ni James.
“To be able to be in the presence of such a legend as great as Kareem, it’s very humbling. Please give a standing ovation to the Captain, please.”
Gikan sa pagkatukod sa NBA niadtong 1946, niabot na og 16 ka mga magduduwa ang nahimong all-time scoring kings. / AP