CARMELO D. LARIOSA
Panadtaran, San Fernando, Cebu
BISAN sa iyang kaugalingon si Melbor nahibulong gyud nganong duolon siyag mga babaye. Aw, dili man hinuon siya matawag nga igo-igo lang ang dagway, kay duna man siyay kaambong nga kaibgan sa mga dalaga nga susama niyag pangedaron. Pero makapahibulong na man god kay daghan na man siyag uyab karon nga hingkod na siyang ulitawo ug duna nay maayong trabaho sa usa ka kompaniya. May listahan siya sa iyang nauyab nga mga dalaga, ug dili sa pagpanghambog miabot silag katorse ka buok. Sa ilang baryo lang naa sila si Jennylyn, Flor, Jessica, Hilda, Erika, Mary Ann, Lourdes. Dunay upat didto sa ilang lungsod, sila Melba, Jenireka, Shirly ug Nerissa. Sa silingang balangay duna siyay duha ka uyab. Ug didto sa siyudad may uyab sab siya didto nga higala sa iyang manghod nga dalaga. Silang tanan mao gyuy ingnon tang punga mohatag og higayon o lugar nga makaduol kaniya o maka-deyt sa lainlaing adlaw o oras nga iyang gigahinan og eskidyul. Nakabatyag sab siya nga duna pay ubang mga dalaga nga gustong makighigala kaniya, apan iya na lang gilikayan kay espuko mong katorse na kabuok iyang uyab! Nagkadipudipo ug nagkabulibuli na gani siya sa mga eskidyul sa adlaw nga kada usa kanila iyang ika-deyt.
Usa ka gabii didto sa sala sa ilang balay gikahinabi ni Melbor ang iyang inahan.
“Ma, nahibulong man ko nga ingon sa humok man kayo ang mga kasingkasing sa mga dalaga ngari nako. Sila may mag-una-una ug aron di ko nila nganlan og bayot, ako na lang silang giuyab. Sus, Ma, katorse na ka buok ang akong uyab! Gusto na kong molikay!” ni Melbor ngadto kang mama niya Cynthia.
“Dili na ikatingala, uy, Melbor, kay guwapo ka man,” sagbat ni Cesar, amahan ni Melbor, nga may pagka hambugeruon.
“Kuan man god, Melbor, maong duolunon kaayo kag mga babaye kay duna ka may awom diha sa imoha. Nagpatong gyud sa tumoy ang dakong awom,” ni Cynthia nga matuotuohon. “Mao nay sulti ni Lolo Manuel nga usa ka albularyo, nga basta awman kag dako sa imong kinatawo, gukdunon kag babaye...”
“Mao ba diay, Ma? Mao diay nga daghan kog uyab ron. Kuyawan ko, Ma, basig magkahibaw-anay sila ug masuko sila nako,” ni Melbor nga gibati og kabalaka.
“Mao ba diay, Cynthia, basta awoman ka? Ako duna sab koy awom diri sa akoa. Gukdunon sab diay kog babaye?” ni Cesar nga nagtingsi nga mitan-aw sa iyang asawa.
“Saba diha! Gatanghal lang nang imong nawong da! Awman god tawon!” ni Cynthia nga misulinga sa iyang bana, dayong paingon sa kusina aron mag-preparar sa ilang panihapon.
UNYA dihay usa ka dalaga nga nahigustoan gyud ni Melbor. Dugay-dugay gyud ang iyang pagpanguyab niini usa siya sugta. Midagan og lima ka bulan ang pagpanguyab niya kang Sofia. Namatikdan ni Melbor nga sa higayon nga magkatupad silag lingkod, magpakahilom lang kini.
Paghiabot sa Pebrero 14 nga maoy adlaw sa gugma kun Valentine’s Day nag-deyt sila si Melbor ug Sofia. Didto sila sa usa ka matahom nga Beach Resort. Sa gabii sa ilang pagpanuroy sa baybayon may gisulti si Sofia kang Melbor.
“Melbor,” ni Sofia nga wala motan-aw sa ulitawo. “Sayod ko nga ika-kinse ko nimong uyab, kay si Manang Nerissa nako maoy imong ika-katorse nimong uyab. Pero, Mel, ayaw lang kabalaka kay ‘in love’ man kaayo ko nimo. Dugay nang namatay si Ate Nerissa. Sa nagpinal na siya nagpangyamyam siya sa imong ngalan. Pero ‘past is past.’ I’m here with you now to take over the place of my sister. I love you, Melbor, Happy Valentine!” Midip-ig si Sofia kang Melbor nga naamang human nabati ang saysay ni Sofia. Apan nahibawo siya nga si St. Valentine nasayod nga si Sofia na ang binuhat alang kaniya, ang iyang katapusang Valentina. (KATAPUSAN)