Nakatakdang makigharong og beteranong boksidor si Olympic bronze medalist Filipino Eumir Marcial sa iyang pagbalik og away karong Pebrero 12, 2023 (PH time) sa US.
Ikasangka ni Marcial ning maong tahas si Ricardo Ruben Villalba sa Argentina sa usa ka 6-round middleweight bout.
Kumpara ni Marcial, kinsa naggunit pa lang og 3-0, 1KO nga rekord, si Villalba taas na og kasinatian ug naghupot kini og 20-7-1 nga rekord.
Sa labing unang away ni Marcial isip professional boxer niadtong December 16, 2020, gilupig niya si Andrew Whitfield pinaagi sa unanimous decision.
Gisundan kini ni Marcial og knockout nga kadaugan batok kang Isiah Hart niadtong Abril 9, 2022.
Sa labing ulahi niyang away, midaog na sab si Marcial pinaagi sa desisyon batok kang Steven Pichardo niadtong Oktubre 8, 2022.
Bisan nisaka na siya sa professional, si Marcial padayon gihapong niaway sa amateur rank diin nakadaog siya og bronze medal sa Tokyo Olympics niadtong 2021 ug gold medal sa 31st Southeast Asian Games sa Hanoi, Vietnam sa miaging tuig. (ESL)