Protektahan sa San Miguel Beermen ang ilang limpyong rekord sa ilang pagpakigbatok sa Meralco Bolts sa main game karong alas 6:45 sa gabii sa Philippine Basketball Association (PBA) Governor’s Cup sa Smart Araneta Coliseum.
Dili ikalimod nga dasok sa talento ang kampo sa Beermen apan alang ni coach Jorge Gallent, dili kini igong basihan ug kinahanglan gihapon nilang mokayod isip usa ka puwersa.
“As I always said, we have to play as a unit to progress offensively,” matod ni Gallent nga napatik sa www.pba.ph.
Gipahimangnuan ni Gallent ang iyang mga batos nga munasghinahawang diriyot silang madisgrasya sa ilang kadaugan batok sa Magnolia Chicken Timplados Hotshots, 100-98, sa labing ulahi nilang duwa.
“We struggled with our offense in the first half because we weren’t playing defense. We also weren’t reversing the ball and we’re just playing one-on-one,” batbat ni Gallent kabahin sa ilang duwa batok sa Hotshots.
Ang Beermen kasamtangang adunay 4-0 nga rekord.
Batok sa Bolts, nga adunay 3-1 nga rekord, gituohang laing malisod nga kombati ang sagubangon sa Beermen.
Sa pagpangulo sa ilang makapaukyab nga import nga si KJ McDaniels, ang Bolts seguradong makahatag og dakong problema sa bisan kinsa ang ilang makontra.
Sa premirong duwa, magsangka ang parehong nagsalimoang nga Blackwater Bossing ug Terrafirma Dyip sugod karong alas 4:30 sa hapon.
Ang Dyip adunay 1-3 nga rekord samtang ang Bossing naghupot og 1-2 nga baraha. (ESL)