Karon nga ang mga tunghaan nag full face to face na og klase, mibalik na ang kahimtang sa kahuot sa trapiko. Maorag mas grabe pa kon itandi sa wala pa ang pandemic. Ang kalbaryo sa publiko mao ang pagtadlas sa karsada og labing minos usa ngadto sa tulo ka oras. Mahitabo ni sa rush hours sa buntag ug sa hapon ngadto sa sayo nga kagabhion.
Hayan sud sa duha ka tuig nga pandemic dunay daghang namalit og mga sakyanan tungod sa pagnihit sa transportasyon niadtong higayuna. Karon nga full face to face na ang klase, nanggawas ang tanang pribadong mga sakyanan.
Samtang nanaghan ang pribadong mga sakyanan, nagkuwang usab ang public transport. Kon ang mga tawo nga dunay sakyanan nag-antos sa trapiko, ang ordinaryong mga tawo duha ang giantos: Kahuot sa trapiko ug kalisod sa pagsakay.
Mag-inilugay intawon sa pagsakay busa magkinapyutay lang aron makauli. Lisod ang pagpaingon sa tunghaan ug trabahoan. Lisod usab ang pag-uli.
Ato na lang ba nga dawaton ang kahimtang sa atoang kadalanan karon? O pugson ang mga naa sa katungdanan sa pagpangita og paagi nga maluagan ang kahimtang sa riding public ug sa mga nanag-iya og pribadong mga sakyanan?
Dunay mga dapit sa Cebu City nga tulo ka dekada nang giestoryahan ang pagpalapad sa karsada, apan hangtod karon plano lang gihapon, way gipadulngan.
Ang Bus Rapid Transit (BRT) system nga niadto pang dekada 90 usab gihisgutan wa pa masugdi. Maorag kini nga solusyon naunhan na sa panahon.
Hain kahay maayo nga mopatuman og sistema ang kagamhanan sa schedule sa mga tunghaan ug mga patigayon.
Pananglitan, di padunganon og pabukas ang mga klase ug mga buhatan aron di magdungan sa pagpanggawas ang mga nanag-iya og sakyanan ug magdungan sa pag report sa trabaho, nga natural, mosangko hapit sa traffic gridlock.
Kon way temporaryong solusyon, ang suliran mas modako, mograbe pa. Dugay na gani ni nga suliran, apan ang kagamhanan way nahimo.
Daghan na man unta kaayo nga mga tigom sa paghisgot sa suliran sa trapiko, apan wa kini gipadulngan. Sama gud sa nahitabo sa suliran sa baha nga hangtod karon nagpabiling way solusyon busa nagkagrabe na hinuon.
Mahuman na lang tingali ang siglo, ang suliran magpabilin nga di masulbad. Igo rang tukion ang mga solusyon kon magkaduol na ang eleksyon.
Hayan moabot ang panahon, di na moirog ang mga sakyanan sa kadalanan.