2 ka most wanted sa Sugbo nasikop

Duha ka most wanted persons ang nasikop sa managlahing operasyon sa kapulisan sa Sugbo sulod ning semanaha.

Ang mga suspek giila nga sila si Japsy Villuna, 25, taga Barangay Lamac, lungsod sa Pinamungajan, lalawigan sa Sugbo ug Benson Mahipos Borinaga, 35, lumolupyo sa Sitio Tubod, Barangay Sapangdaku, dakbayan sa Sugbo.

Si Borinaga adunay balay sa Barangay Sudlon, dakbayan sa Sugbo. Sila si Villuna ug Borinaga giila nga no. 2 ug 3 most wanted sa Sugbo.

Si Villuna, kinsa gipasakaan og kasong statutory rape ug acts of lasciviousness, nasikop sa iyang balay alas 4:26 sa hapon sa Lunes, Pebrero 6, pinaagi sa warrant of arrest nga giisyu ni Judge Judilyn Hugo Tapia Menchavez sa Toledo City Regional Trial Court Branch 8 niadtong Enero 7, 2023.

Si Lieutenant Colonel Randy Korret, hepe sa CIDG Cebu City Field Unit, ni-serve sa warrant batok kang Villuna human nakadawat og impormasyon nga nitambong og kasaulogan sa fiesta sa ilang barangay.

Gitugotan siya sa korte nga makapiyansa og P200,000 alang sa lain niyang kaso bisan og walay gitugot nga piyansa alang sa statutory rape.

Si Borinaga, sa pikas bahin, nasikop sa alas 7:38 sa gabii sa Martes, Pebrero 7, sa iyang kasong pagpatay niadtong Septiyembre 27, 2021 sa Brgy. Sudlon, pinasikad sa warrant of arrest nga giluwatan ni Judge Estela Alma Singco-Caruso sa Regional Trial Court Branch 12 sa dakbayan sa Sugbo nga way piyansa nga girekomendar.

Ang duha ka mga operasyon gihimo sa Criminal Investigation and Detection Group (CIDG) Cebu City Field Unit.

Matud ni Korret nga duha ka mga semana nilang gimonitor ang mga lihok ni Borinaga.

Human makakuha og kompirmasyon nga mobiyahe siya sa bukid aron bisitahon ang iyang mga kabanay, ila dayong gilusad ang operasyon sa Cebu City Mobile Force Company.

Si Borinaga gitumbok nga nipusil patay kang Louie delos Angeles atol sa kapistahan sa Sinulog niadtong 2018 sa Sitio Tubod, Barangay Sapangdaku.