Gipahinumdoman na usab sa Department of Social Welfare and Development (DSWD 7) ang mga potensyal nga bag-ong benepisyaryo sa Pantawid Pamilyang Pilipino Program (4Ps) para sa 2023 nga makompleto ang tanang rekisitos sa dili pa magsugod ang registration ug validation karong buwana.
Target sa DSWD-7 nga sugdan ang registration ug validation process sa umaabot nga ‘community assembly’ sa mga potensyal nga bag-ong 4Ps beneficiaries karong Pebrero 15, 2023, nga dungan nga himuon sa tibuok Central Visayas.
Hinuon, gisugdan na sa ahensya ang pilot registration ug validation sa 50 ka mga potensyal nga benepisyaryo kagahapon, Pebrero 7, sa Barangay Basak-Pardo, dakbayan sa Sugbo.
Si Maricor Rote, ang Beneficiary Data and Management (BDM) Focal Person sa DSWD-7, nagkanayon nga ang ahensiya higpit sa pagsusi ug pag-validate sa gikinahanglang mga dokumento ug potensyal alang sa bag-ong benepisyaryo nga marehistro sa programa.
Dugang pa ni Rote nga obligado ang mga potensyal nga benepisyaryo nga magdala og gikinahanglang mga dokumento sama sa marriage certificate sa mga ginikanan, birth certificate, school enrollment certificate, health enrollment certificate sa ilang mga anak ug valid identification card (ID), o uban pang alternatibong mga dokumento isip kabahin sa pagsuporta, mga dokumento nga ipresentar sa panahon sa validation.
“If ang potential beneficiary nato kay kulang pa sila sa supporting documents kay i-discourage nga mo-attend sa community assembly, kanang first meeting sa tanang beneficiary nga itawag kay adto ta mag-validation, sutaon nato ang households kon tinuod ug makapasar sa atong criteria,” matud ni Rote atol sa ‘Kapihan sa PIA’ program niadtong Miyerkules, Pebrero 8, 2023.
Target sa DSWD-7 nga marehistro ang 90,242 ka bag-ong 4Ps beneficiaries sa lalawigan sa Sugbo, apil na ang highly urbanized nga mga siyudad, nga adunay labing taas nga ihap nga 40,817 ka bag-ong benepisyaryo, gisundan sa Negros Oriental nga adunay 31,625; Bohol nga adunay 16,971; ug Siquijor nga adunay 829.
Kini maoy mga puli niadtong migraduwar o ni-exit sa programa ug igo na sa kaugalingon, ingon man ang mga panimalay sa 4Ps nga adunay mga bata nga nakatapos sa ilang senior high school nga pagtuon ug walay nabantayan nga mga bata nga kwalipikado. (EHP)