Gilauman sa Department of Public Works and Highways (DPWH 7) nga mahuman ang pagtrabaho sa pundasyon sa tukuron nga Cebu Provincial Government Center sa Lungsod sa Balamban karong Hulyo 2023, mas sayo sa ilang unang target month nga Nobiyembre ning tuiga.
Subay sa nahitabong tigom tali ni Cebu Governor Gwendolyn Garcia uban sa engineers sa DPWH 7 nga gipangulohan ni Regional Director Ernesto Gregorio Jr., gipahibalo niini nga ila nang giugmad ang site development ug ang pagtukod sa foundation structure sa replica sa executive building sa Kapitolyo sa 2.3 ektarya nga luna nga naangkon sa Kapitolyo.
Kini subay usab sa tinguha ni Garcia nga ibalhin ang government seat sa Probinsiya sa Sugbo gikan sa Dakbayan sa Sugbo ngadto sa Lungsod sa Balamban.
Apan gipasabot ni Gregorio nga dili pa paigo ang pundo aron mapabarog ang kinatibuk-an nga replica sa edipisyo sa Kapitolyo.
Tungod niini, himuon ang pag construct phase by phase mag depende usab sa pundo nga ihatag sa Nasudnong Kagamhanan ingon man ang pundo sa Probinsya sa Sugbo.
Sa impormasyon gikan sa Sugbo News, media arm sa Kapitolyo, giingong naka-secure na ang kagamhanan og unom ka mga tituladong luna sa maong site nga mokabat og 17.5 ka ektarya.
Ang gobernador una nang nagplano nga mopalit og dugang 50 ka ektarya nga luna duol sa maong site aron makatukod pa ang Kapitolyo og provincial ug regional offices alang sa national government agencies.
Ang Kapitolyo una nang nigahin og P550 milyunes ubos sa proposed 2021 budget alang sa pagtukod sa edipisyo sa lungsod.
Sa miaging tuig, pasiunang nigahin ang Nasudnong Kagamhanan og P200 milyunes gikan sa sa General Appropriations Act (GAA) alang sa maong proyekto diin gamiton kini sa Probinsiya alang sa site development.
Si Senador Sonny Angara nisaad usab og laing P100 milyunes alang sa pagtukod sa edipisyo samtang si Senador Francis Tolentino nisaad og P80 milyunes alang sa maong proyekto.