Moabot ngadto sa 255 ka personnel sa Cebu Police Provincial Office (CCPO) ang gipaubos sa kinalit nga drug test sa pagpangulo ni Police Colonel Rommel Ochave, hepe sa CPPO.
Gisugdan ni Ochave ang pagpa-drug test sa police personnel niadtong Enero 2023 diin siya ang unang nagpakuha og urine sample sa Regional Forensic Unit (RFU 7).
Matud ni Ochave nga ang random drug test sa tanang pulis sa probinsya kabahin kini sa internal cleansing nga gipatuman sa PNP organization.
Gitinguha sa PNP nga walay sakop nga tiggamitan sa ilegal nga drugas ug kon duna man, papahawaon kini sa serbisyo.
Malipayon hinuon nga gipahibawo ni Ochave nga sa 255 nga napaubos na sa drug test, walay nagpositibo sa paggamit sa ilegal nga drugas.
Duna pay kapin sa usa ka libo ang wala pa ma drug test apan gitinguha ni Ochave nga mahurot ang tanang personnel sa CPPO.
Niadtong Martes Pebrero 7, 2023, dunay 150 ka personnel sa CPPO ang gipatawag aron ipaubos sa surprise drug test nga gipasiugdahan sa Provincial Intelligence Unit ug Regional Forensic Unit 7.
Lakip sa gipaubos sa drug test ang 40 ka personnel sa Minglanilla, 73 sa Naga City police station ug 37 sa San Fernando.
Negatibo usab sa paggamit sa ilegal nga drugas ang 105 ka mga personnel sa Consolacion police station, Liloan ug Compostela nga gi drug test niadtong Pebrero 1, 2023.
Nibahad si Ochave sa mga personnel nga mag positibo sa paggamit sa ilegal nga drugas nga iya gyud kining taktakon sa serbisyo.