Pasado ang Cebu Provincial Government sa evaluation alang sa good financial housekeeping (GFH) sa Department of the Interior and Local Government (DILG) alang sa tuig 2022.
Lakip kini sa lima ka component cities, tulo ka high-urbanized nga siyudad ug 33 ka mga lungsod sa probinsya, nga nakadawat usab sa samang pasidungog sa pagpakita sa transparency ug accountability sa paggasto sa mga programa ug proyekto alang sa ilang mga konstituwente.
Mga siyudad mao ang component cities sa Bogo, Carcar, Naga, Talisay, ug Danao, highly-urbanized nga mga siyudad sa Sugbo, Lapu-Lapu ug Mandaue.
Ang mga lungsod naglangkob sa Alcantara, Alcoy, Alegria, Aloguinsan, Asturias, Badian, Balamban, Bantayan, Barili, Boljoon, Tabuelan, Borbon, Catmon, Daanbantayan, Dalaguete, Ginatilan, Liloan, Madridejos, Minglanilla, Moalboal, Oslob, Tuburan, Pinamungahan, Ronda, Samboan, San Fernando, San Remigio, Santa Fe, Santander, Sibonga, Sogod, Tabogon ug Tudela.
Si Atty. Ian Kenneth Lucero, DILG provincial director, niingon nga ang nakapasar sa GFH evaluation usa ka testamento nga maayo ang pagdumala sa Cebu Provincial Government sa panudlanan niini.
“Kini atong pagpasar sa Good Financial Housekeeping nagpamatuod lang nga sakto ug maayo gayud ang gikinahanglan sa panudlanan sa atong Probinsiya sa Sugbo ubos sa liderato sa atong inahan sa Sugbo, si Governor Gwen,” matud ni Lucero pinaagi sa Sugbo News, social media arm sa Kapitolyo.
Ang Good Financial Housekeeping nagtumong sa pag-ila sa mga Local Government Unit (LGUs) nga adunay maayong performance sa financial transparency.