BUGHA ang tulo ka mga sakop sa Bangsamoro Islamic Freedom Fighters (BIFF) ubos sa Karialan faction samtang laing usa ang naangol sa gilusad nga operasyon sa 33rd Infantry (Patriot) Battalion (IB), Philippine Army alas 3:15 sa hapon, Martes, Pebrero 7, 2023, sa Mamasapano, Maguindanao del Sur.
Mga napatay gipang-ila nga sila alyas Suharto, alyas Majid ug alyas Kiram.
Matud ni 33IB Commander Lieutenant Colonel Benjamin Cadiente Jr., nilusad og fire mission ang ilang puwersa batok sa posisyon sa grupo ni alyas Boy Jacket sa BIFF-Karialan sa Barangay Liab sa Mamasapano sa maong probinsiya.
Bungkag ang gilubluban sa mga terorista diin tulo ang napatay samtang usa ang naangol.
Narekober sa mga napatay ang usa ka 5.56mm M16A1 rifle, duha ka homemade revolver sa cal. 38mm ug cal. 5.56mm, usa ka cal .45 pistol, usa ka cartridge sa 81mm HE, duha ka 40mm grenade launcher ammunition, upat ka cartridge nga 40mm, ug tulo ka improvised explosive device (IED).
Gikanayon ni 601st Infantry Brigade Commander, Brig. Gen. Oriel Pangcog nga ang 33IB ang padayong magbantay sa mga hilit nga dapit sa Maguindanao alang sa kaluwasan sa mga sibilyan batok sa grupo ni Kumander Boy Jacket.
Nanawagan si 6th Infantry (Army) Division Chief ug Joint Task Force Central Commander Major General Alex Rillera sa ubang sakop sa BIFF nga mosurender na ug manginabuhing malinawon kuyog ang ilang pamilya.
Karong tuiga, 10 ka BIFF na ang mitahan sa sabakan sa gobyerno samtang tulo ang napatay sa operasyon.