WALA pa makalingkawas si Vice Mayor John Paul Lampig sa Boston, Davao Oriental sa insidente sa "hit-and-run" nga gikamatay sa 22-anyos nga babaye sa Davao City bisan pa sa gipresentar nga "flight manifesto".
Atol sa AFP-PNP press conference niadtong Pebrero 8, 2023, gikanayon ni Davao City Police Office-Traffic Enforcement Unit (TEU) head Major Dexter Domingo nga bisan kon si Lampig nangatarungan nga wala siya sa dihang nahitabo ang insidente, mahimo pa gihapon siyang imbestigahan.
"We are not closing the door, kung meron pa kaming nakita na probability na liability, we will do it [file a case]," pasalig ni Domingo.
Gitug-an ni Domingo nga ang ilang imbestigasyon nagpakita nga ang pahayag ni Lampig gipamatud-an pinaagi sa iyang "flight details".
"Dumating po siya ng January 28 ng 8:30 ng gabi then noong January 29 umuwi na po sila, doon lang po sinabi ng ating driver suspect na nakabangga siya," saysay ni Domingo.
Dugang pa niya nga ang pamilya sa biktima ug ang drayber sa motorsiklo niduso na og kaso batok sa suspek kinsa boluntaryo nga nitahan ngadto sa ilang buhatan unom ka adlaw human sa insidente.
Ang suspek mag-atubang og paglapas sa Revised Penal Code Article 365 ug Article 275 ug gipasakaan og kasong "reckless imprudence resulting in homicide, serious physical injury and damage to property, and abandonment."
Niadtong Enero 26, ang biktima nga ginganlan og Ana Mae Talili namatay gilayon sa may Tulip Drive, McArthur Highway sa Davao City.
Tungod sa kalidad sa resolusyon sa closed-circuit television cameras (CCTVs) sa lokasyon sa insidente, mga awtoridad wala gilayon makakuha og impormasyon bahin sa behikulo nga mibangga sa biktima, nga dali sab nga misibat human sa hitabo.
Pipila ka adlaw human sa insidente, si kanhi Presidente Rodrigo Duterte nihanyag og P500,000 ganting salapi ngadto sa bisan kinsa nga makahatag og giya sa tag-iya sa behikulo.
Human ang panawagan ni Duterte, ang suspek misurender gilayon ngadto sa mga awtoridad niadtong Enero 31. (KSD)