NASIPLATAN sa usa ka residente ang tulo ka mga tarsier sa bukirong bahin sa Barangay Don Mariano sa Lupon niadtong Biyernes sa hapon, Pebrero 3, 2023.
Si Glennford Montejo nagsaysay nga samtang ilang gihinloan ang ilang yuta, nakurat sila sa dihang nakita ang tulo ka mga tarsier sa punoan sa Durian ug sa Buyo-buyo.
Saysay niini nga kini ang unang higayon nga nakakita sila og tarsier ug wala nila gihilabtan.
Nalipay sila sa pagtuo nga sa Bohol lang makita ang susama niini nga mananap.
Ila sab dayon kining gitaho sa ilang barangay aron matala ang maong hitabo ug aron nga maoy manalipod ug makapahibalo sa publiko nga di kini hilabtan.
Sa mga hulagway nga gipaambit sa vlogger nga Jopay The Explorer, makita ang tulo ka mga himsog nga Philippine Tarsier nga perteng kapyot sa sanga ug punoan sa Durian ug sa Buyo-buyo.
Ubos sa International Union of Conservation of Nature (IUCN) giilang threatened species ang mga Philippine Tarsier tungod sa nagkagamay nga populasyon niini.
Ang Philippine Tarsier protektado ubos sa Republic Act 9147 o Wildlife Resources Conservation and Protection Act diin gibawal ang pagdakop, pagpatay ug pag-atiman niini.