SRP P125 kilo sa sibuyas gikalipay

File photo
File photo

GIKALIPAY sa katawhan labi na kadtong mga nagkarenderya ug bisan ang mga negusyante og gulay ug lamas sa pagpagawas sa taho sa Department of Agriculture (DA) nga sugod Miyerkules, Pebrero 8, 2023, mapatuman na ang P125 nga suggested retail price (SRP) sa imported nga pula nga sibuyas bombay.

Kini ang gibutyag ni DA Spokesperson Assistant Secretary Kristine Evangelista tungod kay wa pa miubos ang presyo sa imported nga sibuyas sa merkado diin nagpabilin lamang ang mga imported nga sibuyas sa presyo niini nga P280 itandi sa nihit kaayo nga local onions nga P450-P520 matag kilo.

Sa Davao Region, mapalit sa mga palengke ang P250-P280 nga kilo sa mga imported red onions.

Sumala ni Esmeralda Cosain, 56-anyos, nanag-iya og kan-anan sa Barangay Lapulapu, Agdao District, Davao City nga dako kaayo iyang kalipay kung ang presyo sa sibuyas moubos pa gyod.

"Malipay kaayo kay dili gyod puwede walay sibuyas ang giluto, alang nako, kuwang ang sangkap, ang lami, mao nang napugos na lang gyod ko sa mahal nga sibuyas, bahala'g ginagmay lang ang ibutang, basta naay pahumot gamay sa giluto," ingon ni Esmeralda.

Alang usab sa tindera'g gulay ug mga lamas sa Agdao Public Market nga si Catherine Opong, 44-anyos, taga Barangay San Antonio, Agdao District ning siyudad nga kon anaa na ang P125 nga SRP sa sibuyas, dili lamang sila molayo niini og presyo nga mapalit sa publiko.

"Kon ang SRP P125, paginansiya na lang mi og gamay kay para pambawi sa gastos, sa labor, mga P150 ang kilo to P165 okay na kaayo para pud ang mga suki makaundang sa kapuwesyo sa kamahal sa mga local onions nato," ingon ni Catherine.

Sa Agdao Public Market ug sa Bankerohan Public Market, mapalit ang imported red onions sa tag P250-P280 matag kilo, samtang wala na sab kaayo gatinda og local red onions sanglit wala na kini sa bodega nga gihulipan na sa mga imported nga angkat sa gobyerno gikan sa laing nasud.

Ang white big onions mapalit sab kini sa tag P290-P300 matag kilo.

Hinuon, giklaro sa DA nga ang SRP ipatuman alang lang sa mga imported nga sibuyas ug walay apil niini ang presyo sa lokal nga sibuyas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph