Duha ka mga babaye ang gipangdunggab sa managlahing mga dapit sa lalawigan sa Sugbo, usa ang patay samtang usa kritikal.
DALAGUETE
Talandugon ang kahimtang sa usa ka babaye human gidunggab sa iyang kainom, alas 4:45 sa kaadlawon sa Martes, Pebrero 7, 2023, sa Sitio Solong-on, Brgy. Tapon, lungsod sa Dalaguete.
Si Freda Barido Emlarino, 46, taga Brgy. Tapon, Dalaguete, nakaangkon og mga samad dinunggaban sa lawas.
Nag-inom sila si Emlarino ug duha ka mga suspek nga sila si John Mark Quevedo, 20, ulitawo ug Rosedem Gutib, 24.
Pipila ka oras dihang nangahubog na, sumala sa kapulisan, ang mga suspek ningtanyag sa biktima nga ihatud sa ilang balay sakay sa motorsiklo nga gimaneho ni Gutib tungod sa kahasol sa kahubog ni Emlarino.
Pag-abot nila sa lugar ni Emlarino, nikanaog ang biktima apan si Quevedo nga angkas usab kalit nga nibunot sa kutsilyo ug gidunggab ang biktima sa tuong dughan.
Nisibat ang mga suspek ug ang biktima nga dunay mga samad nakapangayog panabang sa mga tagbalay sa lugar busa nadala sa Argao District Hospital.
Sa follow-up operation sa kapulisan, nasikop sila si Quevedo ug Gutib, pulos mga lumolupyo sa Sitio Lomboy, Brgy. Catulohan, Dalaguete.
Si Police Major Gilfred Baroman, hepe sa Dalaguete Police Station, nagkanayon nga ang mga suspek ilang nadakpan alas 6:00 sa gabii Miyerkules, Pebrero 8, 2023.
Matud ni Baroman, ang duha mga suspek gihasolan sa biktima nga hubog na sa videokehan.
“Sige daw ni komedyahan ang biktima. Giingnan ang suspek (Quevedo) nga gamaya nimo og ‘*t*n’ uy. Unya manghikap sa bugan,” matud ni Baroman base sa saysay sa suspek.
SAN REMIGIO
Patay ang usa ka lola human gidunggab sa silingan nga gikatahapang tulisan, alas 11:00 sa gabii, Martes, Pebrero 7, 2023, sa Brgy. Lambusan, lungsod San Remigio.
Si Fortunata Verdida Cortuna, 72, minyo, nagpuyo sa nahisgutang lugar, nakaangkon og daghang mga samad dinunggaban sa kalawasan.
Nasikop sa follow up operation sa kapulisan sila si Larry Aballe, 52, construction worker, ug Jovanie Capada, 21, construction worker, nagpuyo sa nahisgutang lugar.
Si Police Lt. Col. Windell Abellana, hepe sa San Remegio Police Station, nagkanayon nga ang biktima nadala sa Provincial Hospital sa Bogo City, pero nakabsan na sa kinabuhi.
Si Aballe giingong maoy nisulod sa panimalay agi sa bintana ug si Capada maoy back-up, nagpabilin sa likod sa balay.
Si Aballe nakasulod sa kwarto ug manguha na og kwarta apan ang biktima nakamata ug nisinggit og panabang hinungdan nga gidunggab.