Tungod sa naghaguros nga gugma, ang suspek sa pagpatay nga usa ka drayber sa e-trike niangkon nga iyang napatay ang lalaki nga silingan nga iyang gituohan nga kabit sa iyang asawa.
Kini ang sulti sa suspek nga si Julieto Jaranilla, hingkod, minyo, kinsa nitahan sa kapulisan sa Talisay City.
Samtang, ang biktima giilang mao si Germelino Callao, 43, lumad nga taga Negros Oriental, kasamtangang nagpuyo sa Sitio Bahala, Barangay Dumlog, Dakbayan sa Talisay.
Ang lawas ni Callao nakaplagan sa dalan Bascon, Barangay Dumlog, dakbayan sa Talisay, alas 4:30 sa kaadlawon sa Miyerkules, Pebrero 8, 2023.
Si Jaranilla nisulti sa mga tigbalita nga iyang gibunalbunalan og gahi nga butang ang biktima gumikan sa grabing selos.
Dihang gikahinabi sa media, gibutyag ni Jaranilla nga gisundan niya ang iyang asawa ug biktima.
Dugang niya nga nakasukol pa ang biktima kaniya dihang iyang gibunalbunalan.
Si Police Lt. Col. Randy Caballes, hepe sa Talisay City Police Station nga nahinabi sa Superbalita Cebu, nagkanayon nga ‘love triangle’ ang istorya nga hinungdan sa krimen.
Ang suspek nibutyag nga tulo ka bulan na niyang nahibaw-an nga dunay relasyon ang iyang asawa ug biktima.
“Nasakpan man daw niya nga nagkuyog iyang asawa sa biktima. Iyang gibunalag tubo,” matud ni Caballes.
Si Caballes nisugyot nila nga ipa-autopsy ang lawas sa biktima aron masuta kon unsa ang namatyan niini. Ang kapulisan nag-andam sa kasong homicide batok sa suspek.
Samtang si Marie Briones, kapuyo sa biktima nga nahinabi sa DYSS Super Radyo Cebu, nibutyag nga Martes sa gabii nipauli iyang kapuyo nga si Callao uban ni Linda, asawa ni Jaranilla.
Matud ni Briones, si Callao nisulti nga nanghangyo si Linda nga sa ilaha una matulog human siya giingong kulataha sa suspek.
Si Briones nibutyag nga naluoy siya sa kahimtang ni Linda hinungdan nga niuyon siya nga adto matulog sa ilang balay.
Apan pagka alas 2:00 sa kaadlawon sa Miyerkules nihangyo si Linda nga magpahatud sa biktima sa ilang balay.
Dason ni Briones nga nabantayan niya ang bana ni Linda nga dunay dala nga gahi nga butang nga niadto sa ilang balay, apan wa lang siya nagtagad.
Si Briones diha na nahibalo sa iyang mga silingan nga napalgan ang iyang kapuyo nga wa nay kinabuhi. / GPL, BBT