Gipaabut nga mahinayon na gayud ang dugay nang gipaabut nga barangay ug Sangguniang Kabataan elections karong Oktubre 30, 2023. Ang balaud nga gipirmahan ni Presidente Ferdinand “Bongbong” Marcos (PBBM), Republic Act No. 11935 maoy nag-uswag sa piniliay sa barangay ug Sangguniang Kabataan nga ipahigayon unta sa Dec. 5, 2022. Si Commission on Elections (Comelec) Chairman George Erwin Garcia nipasalig nga mahinayon na gayud karong Oktubre ang kanunay nga naoktaba nga piniliay nga ang katapusan gihimo niadto pang Mayo 2018.
Nasayran nga adunay 1.3 ka milyon ka bag-ong mga botante nga mirehistro aron mopili og barangay kapitan, ug pito ka mga sakop sa Sangguniang Barangay kun barangay konsehal, sa 42,022 ka barangays sa tibuok Pilipinas. Ang mga batan-on mopili usab sa ilang kaugalingon nga Sangguniang Kabataan (SK) chairman ug walo ka SK kagawads, sa matag barangay.
Pinaagi niini, atong matun-an ang kabataan sa kon unsaon ang maayong pagdumala sa usa ka barangay. Hinaut pang ang mga hamtong nga pulitiko mogiya sa mga sakop sa SK sa tinarong nga pamolitika dili sama sa naandang paagi diin gamiton ang salapi ug koneksiyon sa politika pagtuboy sa ilang mga pariyente sa pwesto. Mao na usab unya kini ang pagsubo sa mga kalihukan pagpangandam alang sa mid-term elections karong 2025.
Tinuod ba gayud kining wa pagsinabtanay nila ni PBBM ug sa iyang maguwang nga si Senador Imee Marcos? Kanunay na man gud mosukwahi ang senadora sa baruganan sa iyang manghud nga Presidente. Kahinumduman nga gisaway sa senadora ang nagubot nga importasyon sa asukar nga maoy nakatangtang sa tanang mga sakop sa Sugar Regulatory Board. Wala usab siya makauyon sa pag-ilis –ilis sa Chief of Staff sa Armed Forces of the Philippines (AFP), ingon man sa mahal kaayong presyo sa sibuyas. Gani aduna nay sugyot gikan sa iyang kaubang mga pulitiko nga siya na lang ang himuong kalihim sa agrikultura puli kang PBBM.
Samtang daghang nagtuo nga tininuod kining ilang panagbingkil, aduna say mga nagtuo nga drama lang kini preparasyon sa umaabut nga presidential election. Sumala pa nila nga dili gusto ang pamilyang Marcos nga ipatuo nga nagsabut lang sila kon si kinsa na usab ang modumala sa Malacañang. (mannyrabacal1144@gmail.com)