GIPUSPOSAN og palo-palo sa usa ka dalaga ang kauban niya sa trabaho ug ka-boardmate human giingong nanglibak nga wa siya'y ilis-ilis og panty ug nanimaho og piyangaw.
Nahitabo ang insidente niadtong Martes sa kaadlawon, Pebrero 7, 2023, sa Dakbayan sa Tagum.
Gibutyag sa ila sab nga kauban sa trabaho nga ginganlan og Alyana nga nahinabi sa Superbalita Davao nga si alyas Joanna wa makapugong tungod sa kasuko ug giatake niini si alyas Marites kay gilibak siya niini ngadto sa ilang mga kustomer sa balay kalingawan nga way ilis-ilis og panty.
Nasayran na lang ni Joanna ang pagpanglibak human nangutana ang usa niya ka suki nga kustomer kon tinuod ba ang istorya ni alyas Marites.
Tungod niini, niulbo ang kasuko ni Joanna ug pag-uli niya sa niadtong Martes sa kaadlawon sa ilang boarding house gikompronta si alyas Marites nga niadtong higayona nanglaba.
Apan nanghimakak si alyas Marites bahin niini, hinungdan nagkalalis ang duruha ug nagbinayloay og masakit nga mga pulong.
Kalit lang gisabligan ni alyas Marites og tubig panglaba si Joanna kinsa grabeng sukoa kay wala pa siyay tulog gikan trabaho, hinungdan nga mipunit og palo-palo ug gipuspos ngadto ni Marites.
Maayo na lang kay nagpatunga si Alyana ug uban pa nilang kaubanan ug giuwang ang duruha aron nga di na modako ang ilang kasamok.
Wala na gipaabot sa barangay ang hitabo kay ang mismong tag-iya sa boarding house maoy mihusay kanila ug nagbalik sa ilang maayong kabubut-on.