Matag karon ug unya, di malikayan nga dunay mga panghitabo nga maghatag og tumang stress sama sa pagkamatay sa imong minahal, panagbuwag sa magti-ayon o uyab, pagka-priso, pagka tak-tak sa trabaho, pagsabak nga wa sa plano, wa mabayri ang taga-liog nga utang, away o ingkwentro sa mga in-laws, amo o kaubang mamumuo, gibawian og balay o imbargong sakyanan, ug daghan pang mga kakulian nga makauyog o usab sa dagan sa kinabuhi.
Kasagarang epekto ini sa lawas labad sa ulo, pagpanghu-ot sa dughan, tumang kakapoy, sakitsakit sa tiyan, way gana mokaon, di makatulog o maglimbag-limbag sa katulog, sakit-sakit sa kaunuran o pama-ol, ug mawad-an og gana sa naandang gimbuhaton.
Mausab sab ang mood. Ang uban iritabli o dali na kaayong masuko bisag gamay lang bikil. Ang uban sab bation og tumang kaguol o depresyon, alingasa, kakuwang sa gana, saputon, ug way focus.
Ang uban nga ma stress magsegi na lang sab hinuon og kaon maong maka-ingon ko nga gikaon ang kaguol samtang ang uban wa say kaon-kaon nga mura na hinuon og tukog sa ka daot.
Duna say uban nga magkat-on na hinuon og tabako o inum. Ang uban sab magpalayo sa publiko og prisohon ang kaugalingon sa kaguol. Magsegi na lang og maoy unya magluk-lok sa git-ngit nga suok.
Diay akong mga ipaambit nga mga paagi aron di tantong maapektuhan sa stress.
Gawas sa balay, lakaw-lakaw para maka-hanggap og preskong hangin ug maka-ehersisyo. Makatabang sab kini pa-relax sa baga ug pa kalma.
Hatagi og oras ang kaugalingon sa hilom nga dapit aron maka meditate o yoga. Ang pagpaminaw og soft o spa music dako sab og matabang pa relax .
Pamper yourself panagsa. I treat imong kaugalingon pa manicure, pa salon, pa masahi, suroy o shopping para malingaw ug magmalipayon.
Ayaw pagutom aron di mapasmo unya kaon hinuon og mga presko ug masustansiyang mga pagkaon sama sa utanon, o prutas unya palayo sa unhealthy nga mga habits (sugal, inum o sigarilyo).
Katapusan ang tim -os nga pag-ampo para magiyahan sa kahitas-an.