Gipamatud-an ni former Nets star Kyie Irving nga makagiya siya og usa ka team paingon sa kadaugan pinaagi sa pagpilde sa Sacramento Kings, 122-114 sa ilang duwa sa Sabado, Pebrero 11, 2023 (RP time).
Subling gipangulohan ni Irving ang Dallas Mavericks, bag-o niyang NBA team human sa gihimo nga trade.
Ang bag-ong star sa Mavericks nipakatap og 25 puntos ug 10 ka assists aron sakwaton ang Dallas paingon sa ikaduha niining kadaugan sukad sa iyang pag-abot, ikatulo sa kinatibuk-an gikan sa pagpalta og duwa sa laing star nga si Luka Doncic gumikan sa injury.
Sa primirong duwa ni Kyrie sa Western Conference team, iyang gigasahan ang Mavericks og 24 puntos ug lima ka assists batok sa Los Angeles Clippers nga gibituonan nilang Paul George ug Kawhi Leaonard.
Nitabang kang Irving pag-angkon sa kadaugan samtang nagpaalim pa sa angol si Doncic mao silang Josh Green, nga dunay 17 puntos, ug Tim Hardaway Jr., kinsa nihipos og 15 puntos.
Ang Dallas nilabaw og 24 puntos nga maoy labing dako ug wala na nilingi pa sa Kings hangtod nga nilanog ang katapusang buzzer.
Ang Kings nakadikit hangtod sa 6 puntos apan didto ra kutob ang ilang paningkamot sanglit 20 segundos na lang ang nahabiling oras sa katapusang kwarter.
Nangulo sa Kings nga maoy 3rd seed sa West bitbit ang 31-24 win-lose record mao si De’Aaron Fox, kinsa nipaarak sa iyang 33 puntos ug napili isip All-Star sa labing unang higayon isip replacement.
Ang Kings gikan sa ilang back-to-back wins batok sa Houston Rockets.
Si Domantas Sabones niabag og 18 points ug 10 ka rebounds alang sa Kings, diin siya ang nag-una sa tanang NBA players sa double-double nga adunay 43.
Ang duha ka teams magtiwas sa ilang duha ka mga duwa sa balwarte sa Sacramento karong Lunes.
Sa laing mga duwa, nidaog ang Milwaukee Bucks batok sa Clippers, 119-106, gipakilatan sa OKC Thunder ang Portland Trail Blazers, 138-129, gipukan sa Cleveland Cavaliers ang New Orleans Pelicans, 118-107.
Gisunog sa Miami Heat ang Houston Rockets, 97-95, ug gipilde sa Memphis Grizzlies ang Minnesota Timberwolves 128-107. Sa laing duwa, daog ang Detroit Pistons batok San Antonio Spurs, 138-131.
Gibunalan usab sa Utah Jazz ang Toronto Raptors, 122-116 ug gilumsan sa Boston Celtics ang Charlotte Hornets, 127-116.
Gipainitan sa Phoenix Suns ang Indiana Pacers, 117-104, ug gipabukalan sa Philadelphia 76ers ang New York Knicks, 119-108. (PAC)
