Human sa malampuson nga pagpahigayon sa ilang inaugural season, ang Sugbo Basketball League (SBL), mopahigayon na usab sa ilang ikaduhang edisyon sa Cebu Auto Dealers basketball tournament.
Ubos sa hugot nga pagsuporta sa Everlasting Car Clinic pinaagi ni Severino T. Aleo, ang Season 2 sa nahisgutang kompetisyon mosugod sa Miyerkules, Pebrero 15, 2023, sa Cebu City Sports Institute gym sa barangay Sawang Calero.
Ang 15 ka mga team nga mosalmot pangulohan sa defending champion Team Mitsubishi nga bituonan ni most valuable player (MVP) awardee Jonas G. Kentanar.
Sila mopakita og aksiyon sa kompetisyon nga gibahin ngadto sa duha ka mga bracket.
Ang Bracket A, gilangkuban sa Gateway, Auto Central Group, Toyota Talisay, MG Cebu-Mandaue, FAPC-Mitsubishi Mandaue/Mactan, Ford, Mitsubishi South Team B ug Toyota Land Cruiser.
Samtang sa Bracket B, nagpunpon usab ang TCB, TMDN, Toyota Mabolo, TMDS, Mitsubishi South, Gateway MTC ug Nissan Auto Central.
Tulo ka mga duwa ang nakahan-ay alang sa opening day.
Ang Mitsubishi South mosakbang sa Toyota Mandaue sa panag-engkuwentro nga sugdan sa alas 7 sa gabii. Mosunod ang sangka sa TCB ug TMDN ug sa main match magpinaksitay ang Toyota Talisay ug MG Cebu Mandaue.
Ang torneyo mosubay sa single round robin nga format diin ang top four sa matag bracket maoy moabante alang sa quarterfinal stage.
Ang mga modaog mao usab ang mo-qualify sa semifinals matches aron pagdeterminar sa mga finalist.
Gawas sa championship trophy, cash prize nga P30,000 ang mabulsa sa kampiyon samtang P20,000 ug P10,000 ang madawat usab sa first ug second runner-up.
Medal ug apparel ang madawat sa malakip sa mythical five, ug ingon man makadawat usab og tropeyo ug brand new shoes ang mapiling MVP sa torneyo.
Ang mga duwa ipahigayon sa City Sports Institute gym matag Miyerkules ug sa Zapatera Elemtary Schoool gym matag Sabado. (PAC)
