Modagan pa man tuod og kapin sa usa ka semana pa apan daghan nang nagpangutana kalabot niining dekalidad nga exhibition games tali sa mga inilang collegiate teams sa kaulohan.
Ang buot nakong ipasabot kining panag-engkuwentro tali sa San Beda Red Lions, ang multi-titled team sa National Collegiate Athletic Association (NCAA), ug sa National University (NU) Bulldogs, ang team nga naka established usab og pangalan sa University Athletic Association of the Philippine (UAAAP).
Makapaikag kining maong panag-engkuwentro gumikan kay di nato kalikayan nga moanino man sab gud ang rivalry sa UAAP ug sa NCAA niining duwaa.
Laing makapadugang sa kahinam sa mga Sugboanong basketball fans mao ang presensiya sa mga Cebuano players sa matag habig kansang mga abilidad dinhi gyud sa Sugbo mahashasi.
Sa NU anaa ang sikat nga pointguard nga taga Minglanilla nga si Steve Nash Enriquez, ang most valuable player awardee sa Cesafi high school nga si LA Casinillo, ug ang MVP awardee sa bag-ong gipahigayon nga Chooks-To-Go Sinulog Cup nga si John Galinato.
Samtang sa San Beda, atoa usab didto ang kanhi pointguard sa UV nga si Gabriel Cometa nga taga Mandaue ug ingon man ang bigman nga nga kanhi pambato sa University of San Jose Recoletos (USJ-R) Jaguars nga taga Danao City nga si Clifford Jopia.
Ang duwa ipahigayon sa Mega Dome sa Toledo City sa Pebrero 25 (Sabado) ug sa sunod adlaw (Dominggo) adto na usab sa Bogo City.
Exhibition games man tuod ni pero adunay cash prize. Kon kinsa ang modaog sa matag duwa, mas dako ang mabulsa.
Pero bisan pa siguro og walay cash prize, gipaabot lang gihapon nga mopakita gyud og saktong katakos ang matag habig tungod sa garbo ug dungog, dili lang sa team kon dili lakip na usab ang ilang tagsa-tagsa ka mother league - ang UAAP ug NCAA.
Samtang ubay-ubay na ang nag message diri nato ug nagpangutana kon nganong wala man silay duwa sa Cebu City nga mao man gyud unta ang sentro sa Sugbo.
Sa pagkatinuod lang, gikatakda gyud unta sa Pebrero 24 diha sa Cebu Coliseum ang ilang unang duwa diin ilang kontrahon ang UV Green Lancers ug UC Webmasters.
Apan sa rason kon nganong sa kalit lang nakanselar ni, kana maoy wa nato mahibaw-i. Basin dunay lig-ong hinungdan ang beteranong promoter nga si Lorenzo Chao Sy nga nakapaaghat niya pagkanselar sa duwa.
Pero gibutyag ni Sy nga naa pa siyay umaabot nga mga nindot nga promotions nga kon di man gani sa Cebu City mapahigayon, at least sa kasikbit nga mga lungsod o siyudad. Paabot lang ta, unsa ug kanus-a ni.