Ang sikat nga CPDRC Dancing Inmates nangandam na karon alang sa pagbalik sa pagtan-aw sa publiko human sa duha ka tuig sukad sa pandemya.
Ang Dancing Inmates nipasundayag sa Sabado, Pebrero 11, 2023 alang sa special viewing nga gipasiugdahan sa Cebu Provincial Tourism Office isip kabahin sa mga lakang sa paglusad sa binayran nga public viewing sa grupo.
Matod ni Arnela Tangkay sa Cebu Provincial Tourism Office, nagsugod ang special viewing sa Sabado, ug gikatakdang magpadayon sa tibuok buwan isip kabahin sa evaluation ug improvement sa ilang performance.
“We will have our special viewing for a month, we will be deciding, the decision coming from the governor if ever unsay feedback niya, unsay madungog niya, since makita niya ang mga videos, she will be the one to decide na pwede na mag open to the public,” matod ni Tangkay.
Ang Opisina sa Turismo dili makahatag sa piho nga mga petsa ug mga presyo sa tiket alang sa pagtan-aw sa publiko apan nipasalig nga kon mahuman na ang tanan, ipagawas dayon nila.
Ang umaabot nga kita sa halin sa ticket alang sa mga pasundayag sa mga mananayaw husayon ug ipadala sa ilang mga personal nga bank account tungod kay sila gihatagan og tagsa-tagsa, dugang ni Tangkay.
Ang Dancing Inmates mipakita usab og bag-ong set sa choreographies alang sa mga tumatan-aw. Apil sa ilang dance line up ang “That, That,” usa ka makalingaw, groovy nga kanta ni PSY ug global superstar nga SUGA sa BTS nga gipagawas niadtong Abril 2022.
Ang ilang video sa “Thriller” ni Michael Jackson nahimong global headlines niadtong 2006. Usa ka Netflix documentary nga giulohan og “Happy Jail” gi-release usab niadtong 2019, diin ang istorya sa usa ka ex-convict nga nahimong manager sa jail sa CPDRC ang gipakita.
Ang mga routine sa pagsayaw nagsugod isip usa ka non-punitive nga porma sa rehabilitasyon alang sa persons deprived of liberty (PDL) sulod sa CPDRC niadtong 2006, ug dayon nakakuha og traksyon alang sa ilang makalingaw nga mga lihok sa sayaw ug koordinado nga mga formation. (EKV)