Nahatagan og dugang kahayag ang nagkasalimoang nga season sa Los Angeles Lakers human nila patapsingi ang defending champion Golden State Warriors, 109-103, sa National Basketball Association (NBA) kagahapon.
Wa miduwa ang pangulo sa opensa sa Lakers nga si Lebron James, apan bisan pa man niini nakamaniho ang Lakers sa pagsilat sa Warriors sa ilang mismong balwarte didto sa San Francisco, California.
Si Dennis Schroder maoy nagtimon sa Lakers gamit ang 26 puntos, samtang si Rui Hachimura midugang og 16 puntos.
Ang returning member sa Lakers nga si D’Angelo Russell dali kaayo mipakita sa iyang katakos og mibuylo kini’g 15 puntos, lima ka rebounds ug unom ka assists.
Nahibalik si Russell sa Lakers gumikan sa trade deadline deal nga naglambigit og tulo ka teams.
Kahinumodoman nga si Russell mao ang second overall pick sa Lakers niadtong 2015. Miduwa kini sa Lakers sulod sa 2015 ngadto sa 2017 season.
Ang bigman nga si Anthony Davis miamot og 13 puntos ubanan sa 16 ka rebounds samtang si Jarred Vanderbilt mikamada og 12 puntos.
Duha na kaduwa sa Lakers nga wa si Lebron tungod sa iyang left foot injury sukad nahimo siyang NBA’s leading scorer sa miaging semana diin gipilde sila sa Oklahoma City Thunder.
Ang Warriors miduwa pud nga wala ang ilang superstar ug two-time MVP nga si Stephen Curry tungod sa left leg injury niini.
Mipakita sa iyang katakos ang guard nga si Jordan Poole alang sa Warriors nga adunay 29 puntos, lima ka rebounds, unom ka assists ug duha ka blocks.
Wa makakuha sa ekspektasyon ang Lebron-lead nga Lakers kay tungod ana sila ika-13 nga team sa Western Conference standing bitbit ang 26-31 nga baraha. (RSC)