Usa ka bibo nga dagan alang sa pamilya ang gisaad sa organizers sa PAREF Springdale Titans Run 2023 karong Marso 12, 2023, nga sugdan sa Mandani Bay sa dakbayan sa Mandaue.
Atol sa press launching, giimbitar sa organizers ang running community sa Sugbo, sanglit abli man ang maong dagan alang sa publiko ug dili kini eksklusibo sa eskwelahan.
Ang maong fun run gidumala sa PAREF Springdale School inubanan sa Student Body Organization (SBO) ug parents sa Grade 3 pupils.
Anaa sa launching niadtong Sabado mao sila si Dr. Renante Payod, executive director; Kelie Ko, parent coordinator; Enzo Nathan Go, SBO president; Johann Tan, SBO vice-president; ug Anthony Guarde, SBO adviser.
“What we’re trying to sell to the general public and to our own community is a fun and enjoyable experience through amenities like glow-in-the-dark accessories for a festive and lively event held at night,” matud ni Go.
Adunay lima ka kategoriya nga pwedeng pilian sa gustong mosalmot: ang 10-kilometer, 5K, 3K, 1K ug 3K for Dad and Son (alang sa 12 anyos ug paubos).
Lahi ang Titans Run sa ubang running events kay ipahigayon man kini sa alas 6:30 sa gabii nga adunay Glow in the Dark theme.
Ang tanang runners makadawat og dri-fit race shirt, glow accessory, race bib ug finishers medal.
Ang proceeds sa maong dagan gamiton alang sa school development projects ug sa advocacies sa SBO.
Ang registration fee anaa sa P600 alang sa 1K ug 3K; P1,100 para sa 3K Dad and Son; P650 para sa 5K ug P700 sa 10K. Maka-register pinaagi sa bit.ly/TitansRun2023.