NAGPABILING tanghaga alang sa mga awtoridad ang motibo sa paglunggo sa mag-uuma sa ulo sa laing mag-uuma sa Sitio New Badian, Barangay Bukal, Nabunturan.
Kini ang gibutyag ni PSSG Marlon H. Torrefranca, imbestigador sa Nabunturan Municipal Police Station sanglit sa pagkamatay sa suspek wa na niini masulti ang hinungdan kung nganong gipatay niini nga brutal ang biktima nga si Joel Avila, 58, molupyo sa nahisgutang dapit.
Kahinumdoman nga alas 10:00 sa gabii, Pebrero 7, 2023, ang suspek nga si Jovanie Pedere nakit-an sa iyang igsuon nga si Marvin nga nagbaktas ug nagbitbit og sako kon diin sulod niini ang ulo sa biktima sa bukiring bahin sa dapit.
Nianang pagkabuntag pa sa Pebrero 8, nasayran sa kapulisan sa Nabunturan MPS ang hitabo dihang ang anak sa biktima nga si Juvelyn midangat sa presinto ug gitaho ang nahitabo.
Daling gidulong sa mga pulis ang dapit kon diin gitumbok nga tua ang suspek.
Apan sa dihang gisukit ang suspek kung nganong nahimo niya ang krimen, mihulbot kini og sundang ug giatake ang mga pulis hinungdan nga napugos ang mga awtoridad nga pusilon siya nga miresulta sa iyang kamatayon.
Narekober gikan sa crime scene ang tulo ka basiyo sa bala sa caliber 9mm ug usa ka improvised nga bangkaw ingon man ang sundang nga dunay sakuban gikan sa posisyon sa suspek.