Giila ang ang Taiheiyo Cement Philippines, Inc. (TCPI) sa pakig-alayon sa komunidad pinaagi sa mga purok sa pagpatuman niini sa mga malangkubon nga pagdumala sa kinaiyahan.
Gitanyag sa Environmental Management Bureau (EMB) sa Tunga-tungang Kabisay-an sa TCPI ang usa ka plake sa pag-ila atol sa pagsaulog niini sa Bulan sa Pagpakisayod sa Kinaiyahan uban sa tema, “Bangon: Pag-uswag Labaw sa Panaghisgot ngadto sa Aksyon nga may Kalabutan sa Klima.”
Nakadawat sab ang Solid Earth Development Corp. (SEDC) og laing pag-ila tungod sa “mga paningkamot nga may labot sa Clean Air Management pinaagi sa paghiusa sa mga malungtarong balansayon alang sa kinaiyahan sa mga operasyon sa minahan ug pantalan.”
Gidayeg sab ang kompaniya tungod sa “pasalig ug walay puas nga pagsuporta sa malungtarong programa sa kinaiyahan” ug sa “pagpasundayag sa sistema sa pagduma sa kalidad sa kahanginan ug pagkunhod sa epekto sa nagkausab nga klima.”
Gitunol ni Engr. William P. Cuñado, direktor sa ulohang buhatan sa EMB, kinsa kanhi EMB 7 regional technical director, ang mga pag-ila atol sa Clean Air and Climate Change Exhibit nga gisalmutan sa TCPI ug SEDC ni’ng bag-o pa lang.
Nidawat sa pasidungog si Tsutomu Hirobe, luyo-luyong pangulo alang sa operasyon sa TCPI nga tagduma sa planta, uban ni Emylita B. Ortega, laing luyo-luyong pangulo nga nagduma sa corporate planning division sa Cebu Trade Hall sa SM City Cebu, diin gipahigayon ang exhibit.
Nidawat sa mga pasidungog alang sa SEDC sila si Noel P. Lorica, luyo-luyong pangulo sa kompaniya, uban ni Angelo O. Teopiz, tagduma sa kaluwasan ug panglawas.
Kinasingkasing ang mga buhat nga may labot sa kinaiyahan alang sa TCPI ug SEDC nga ang mga nagdumala ug mga kawani niini nalambigit sa mga programa nga nagpalambo o nanalipod sa kalikupan.
Gipadagan ug gipatuman nila ang mga Social Development Management Program (SDMP) ug Environment Protection and Enhancement Program (EPEP) nga naglambigit sa ilang host communities sa ilang masigka-paningkamot.
“Dili isla ang TCPI. Nanginahanglan ni sa komunidad nga aktibong makiglambigit sa mga programa nga may epekto sa kinaiyahan sa San Fernando,” padayag ni Dwight P. Avila, tigduso sa mga programa sa kinaiyahan sa kompaniya.
“Mahinungdanon ni sa mga tawo, human sa tanan,” nidugang si Avila, tagduma sa TCPI environment and safety division.
Sa Nobiyembre nga nakiglambigit ang TCPI, gisaulog sab sa EMB 7 ang National Clean Air Month ug Climate Change Consciousness Week.
Sa exhibit niini, nitanyag ang TCPI og mga paukyab alang sa mga nibisita pinaagi sa paghatag og corporate giveaways gikan sa marketing division pinaagi ni Sarah Y. Alvarez, AVP alang sa sales administration and logistics division.
Niabag ang SEDC sa TCPI sa mga kalihukan sa EMB 7 sa maong bulan isip hiniusang silver sponsor.
Nangunay si Avila sa pagdumala sa exhibit uban sa iyang mga sakop nga sila si Vivian S. Matin-ao ug Bert C. Yap ug ingon man nila Mary Ann Mendez ug Rechelle Selma sa SEDC.