Nagtuo ang usa ka pari nga ang usa ka barangay kagawad maoy nagpakatap sa istorya nga maayo pa ang pari nga tua na ma-assign sa layo kay mas una pa nga nakabisita sa mga biktima sa sunog kay sa pari nga naa ma-assign mismo sa maong parokya.
Imbes mangumusta sa mga biktima, mamikpik sa abaga ug mohatag sa mga makabuhig-kalag nga mga tambag, nangita hinuon ang pari sa kagawad ug sa dihang nakit-an na, gitudlo-tulisok kini dayon batikos sa kagawad sa mga pulong nga matud pa, di makaon og iro.
Wa makatingog ang kagawad sa kaulaw ug tungod sa gibuhat sa pari, naospital gyod ang kagawad.
Miulbo ang kaspa sa iyang mga kauban sa konseho ug nagplano sila nga mopagawas og resolusyon nga mag-deklarar sa pari nga persona non grata.
Apan wala dayon nila kini mahimo samtang didto pa sa ospital ang kagawad. Ilang gihulat ang kahimtang sa kagawad nga moumento na.
Sa dihang nakagawas na ang kagawad sa ospital, nagplano ang konseho nga maghimo og meeting aron hisgotan nila ang ilang buhaton batok sa pari.
Apan sama sa giingon nga “time heals,” nabugnaw ang kaligutgot nga gibati sa kagawad ug gisultian na lang ang mga kauban sa konseho nga ila na lang iampo ang pari ug dili na lang nila padayunon ang persona non grata nga resolusyon.
Tuod man, nalibre ang pari ug wala madayon ang giplano nga buhaton sa konseho. Unsa man unta ang mahitabo kon natuman gyod ang maong plano?
Matud sa usa ka kagawad, magkutaykutay gyod unta to.
Human sa persona non grata, isunod nila ang pagsumiter sa usa ka sulat ngadto sa obispo nga mag-awhag sa usa ka imbestigasyon batok sa gihimo sa pari ug ipahamtang ang tukmang silot kon mamatud-an nga nakasala o nakalapas ang maong pari sa reglamento sa kaparian.
Mahimo sab kuno nga ilang ikiha ang maong pari sa kaso nga pakaulaw.
Siyaro, matud sa kagawad, og dili mapalagpot ang maong pari sa maong parokya isip pagmatuod nga wala na siya angayi sa mga parokyano.
Asa na man karon ang kagawad? Tungod sa gibating kaulaw, tua na sa lain nga simbahan magsimbahan ang kagawad ug ang iyang pamilya.
Asa na man karon ang pari?
Anaa gihapon sa maong simbahan isip kura paruko, padayon sa iyang mga gimbuhaton.
Nausob ba ang kinaiya sa maong pari? Ang langit ray makatubag, matud sa kagawad.
* * *
Sa dihang hawod pa ang pamilya sa mayor, walay makatupong sa ilang pagkamapahitas-on. Hilabihan gyod ang ilang pagtuo nga magpadayon ang ilang kahawod sa maong lungsod.
Apan sa dihang napildi na sa piliay, abtik pas kilat ang kakalit nga pagkausab sa batasan ug kinaiya. Weder-weder gyod ning kinabuhi.