Kapin sa 800 ka drug surrenderers nga nipaubos na sa recovery and wellness program sa matag local government unit sa Central Visayas nagmartsa sa Cebu City Sports Center uban sa mga sakop sa Police Regional Office (PRO 7).
Sila ang nalambigit kaniadto sa paggamit sa ilegal nga drugas apan karon sila na ang gitawag nga Anti-Illegal Drug Advocates (AIDA), nga tipik sa programa sa Department of the Interior and Local Government (DILG) nga mao ang ‘Buhay ay Ingatan, Droga’y Ayawan’ (BIDA.)
Matud ni Police Brigadier General Jerry Bearis, hepe sa PRO 7, nga labing una kining gilusad tali sa kanhi mga drug user ug drug pushers nga ningtahan atol sa gipahugtan nga war on drugs ni kanhi President Rodrigo Duterte.
Tungod sa ilang determinasyon nga dili na mobalik sa naandan nga bisyo, gigamit sila karon sa gobiyerno nga batukan ang ilegal nga drugas pinaagi sa ilang abag sa kapulisan ug ubang mga ahensiya sa gobiyerno.
Gipasabot ni Bearis nga ang pagbansay sa drug surrenderers sa pagmartsa aron masilsil sa ilang alimpatakan ang disiplina sa kaugalingon.
Atol unya sa pormal nga paglusad niini sa sunod semana, motambong sila si PNP Chief Police General Rodolfo Azurin Jr. ug DILG Secretary Benjamin Benhur Abalos, Jr.
Gawas nga gamiton sila isip anti-illegal drug advocate, tabangan usab sila sa gobiyerno nga makatrabaho pinaagi sa pagpaubos kanila sa training sa Technical Education And Skills Development Authority (TESDA).
Atol sa himuong launching, dunay ilusad nga job fair diin sila mahimong makapili og trabaho uban sa abag sa Department of Labor and Employment (Dole).
Nipasalig usab sa PRO 7 ang mga negusyante sa Sugbo nga motabang sila sa ilang programa alang sa drug surrenderers.
Apan kon dunay mga sakop sa AIDA nga mobalik sa naandan nga bisyo nga mao ang paggamit sa ilegal nga drugas, matud ni Bearis nga ang kapulisan dili magpanuko sa pagpatuman sa balaod batok kanila.
Gipasalig usab ni Bearis nga dili abusaran sa drug surrenderers nga gamiton nila sa ilegal nga kalihukan ang ilang pagkasakop sa AIDA.
Kini ang labing una sa tibuok nasud nga kanhi mga nalambigit sa ilegal nga drugas nga nitahan sa gobiyerno ang gigamit sa kapulisan aron batokan ang ilegal nga drugas sa komunidad.
Gitinguha, matud pa sa DILG, nga buhaton kini sa tibuok nasud tungod sa ilang nakita nga maayo kini nga programa.