Kalabera sa gituohang babaye nakit-an sa hilit nga lugar sa alas 9:00 sa buntag sa Lunes sa Sitio Cogon, Barangay Cogon Cruz, dakbayan sa Danao.
Si Police Senior Master Sgt. Raymund Bacordo, imbestigador sa Danao City Police Station nga nahinabi sa Superbalita Cebu, nagkanayon nga usa ka Elbert Cahayagan, 34, minyo, taga Sitio Cogon, Brgy. Cogon, Cruz, maoy nakakita sa kalabera nga ulo.
Ang ulo gituohang iya sa usa ka babaye kay dunay taas nga buhok nga nahabilin.
Gawas sa mga bukog sa gusok nga nakit-an, duna say pajama nga color pink.
Sumala ni Bacordo nga gumikan sa mga nakuha nila sa dapit, gituohan nila nga iya sa usa ka babaye ang kalabera.
Sumala pa ni Bacordo nga si Cahayagan, uban sa iyang mga higala, namusil og langgam niadtong Dominggo, Pebrero 12, 2023.
Dihang nasum-ok siya sa kalibunan, nakugang kay adunay ulo sa tawo nga kalabera na.
Gibutyag ni Bacordo, nga adunay nipatim-aw sa ilang buhatan nga mo-claim unta sa napalgang bukog kay nawala ang ilang inahan apan dihang nakita nila, wala nila kini gikompirmar.
Giawhag kadtong nawad-an og sakop sa kabanay sa pagsusi sa Danao City Police Station diin gihipos ang kalabera.