Kapin sa 1K ka trabaho sa job fair sa Lapu-Lapu

Kapin sa 1K ka trabaho sa job fair sa Lapu-Lapu

Mokabat sa 1,400 ka mga trabaho ang itanyag atol sa unang job fair karong tuiga sa Dakbayan sa Lapu-Lapu sa Sabado, Pebrero 18.

Ang job fair, ipahigayon sa Outlets sa Pueblo Verde sa Barangay Basak, gipasiugdahan sa Lapu-Lapu City Government pinaagi sa Public Employment Service Office (Peso) ug sa Department of Labor and Employment (Dole) sa Central Visayas, Aboitiz InfraCapital ug Mactan Economic Zone (MEZ 2) estates.

Ang pangulo sa Peso nga si Kim Francisco niingon nga adunay 1,472 ka job openings nga gitanyag sa 24 ka mga partisipanteng kompaniya.

Abli kini gikan sa alas 7 sa buntag hangtod sa alas 4 sa hapon.

Sa laing bahin, giawhag ni Lapu-Lapu City Mayor Junard “Ahong” Chan ang mga nangita og trabaho nga mobisita sa job fair karong Sabado, diin daghang mga kompaniya ang gustong motabang kanila sa pagkab-ot sa ilang gipangandoy nga trabaho.

“Akong kagustohan nga ang matag pamilya sa atong siyudad adunay desente ug tarong nga trabaho,” dugang pa niya. (MKG)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph