Gipahigayon kagahapon, Pebrero 16, 2023, ang groundbreaking sa walo ka andanang building sa Eversley Childs Sanitarium and General Hospital sa Brgy. Jagobiao, dakbayan sa Mandaue.
Nangulo sa seremonyas mao si Mandaue Lone District Representative Emmarie Ouano Dizon uban sa representante ni Sen. Koko Pimentel nga si Joseph Yu, Jagobiao Barangay Captain Michael Oro Masinas, ug Dr. Pythagoras Zerna, medical chief.
Lakip sa nitambong ang opisyal sa Department of Public Works and Highways (DPWH) 6th Engineering Districts nga pinangulohan ni District Engineer Daisy Toledo, City Councilors Nerissa Soon Ruiz , Joel Seno, Anjong Ouano-Icalina ug City Councilor Ting Sol Cabahug.
“Kining tanan nagsugod sa dihang ang among Medical Chief, si Dr. Pythagoras Zerna, mibisita sa akong opisina 2 ka tuig na ang milabay. Nangayo siya og tabang aron mahuman ang on-going construction sa inyong bag-o ug nindot nga building,” matud ni Dizon.
Ang bag-ong edipisyo natukod pinaagi sa tabang ni Senador Koko Pimentel.
“We actually got more than we asked”, matud sa congresswoman, tungod sa gahin nga P65 milyunes sa 2022 ug P105 milyunes ning tuiga alang sa pagpalit og mga kagamitan sa ospital.
Matud ni Dizon, gikinahanglan nga i-upgrade ug i-modernize kining medical facility pinaagi sa pagpasar sa Republic Act No. 11273 nga nagdugang sa bed capacity gikan sa 50 ngadto sa 200 nga gipangamahanan ni Mandaue City Mayor Jonas Cortes sa iyang termino isip kongresista.
“Ang atong gibuhat mao ang paghuman sa iyang nasugdan,” dason ni Dizon. (HIC, PR)