IPIL, Zamboanga Sibugay, Philippines - Kon basketball sa atong nasod na gani ang hisgutan, di na siguro hibintahaan ning rehiyon sa Mindanao kon mao nay mopahigayon og tournament.
Tiaw mo bay aron lang maagni ang mga sikat natong magdudula, dili gyud sila magpanuko sa pagpagawas og igong gahin ilabi na kon kini kabahin sa ilang mga dagkong kalihukan.
Pananglitan sa nagpadayon nga 22nd Araw Ng Zamboanga Sibugay, ang local nga pangagamhanan niimbitar og mga team alang sa 1st Governor Ann K. Hofer Open Invitational Basketball tournament nga gipahigayon diri sa Provincial Capitol Gym sa lungsod sa Ipil.
Tiaw mo nay ilang gitagan-an og kapin o kulang P3 million.
Sa premyo lang daan, modagan na ngadto sa P1.1 million ang gigahin diin ang P500,000 niini makuha sa kampiyon, P300,000 sa runner-up samtang P200,000 ug P100,000 sa third ug fourth placers.
Unya gawas sa premyo, aduna pay subsidy nga tag P200,000 ang matag team. Kay ang torneyo gisalmotan sa lima ka teams, so another P1 million ang madugang.
Libre kini ngadto sa publiko pero hapsay nga pagkadala sa crowd kay gikontrolar man ang manan-aw nga maigo ra sa kapasidad sa gym. Hinuon dunay big screen sa pikas edipisyo nga adto manan-aw ang dili makasulod.
Gihatagan gyud sa pangagamhanan og saktong lingaw ang ilang katagalungsod.
“So far kini siguro maoy pinakadakog premyo sa mga lega nga akong naapilan,” matud pa sa Sugboanong coach nga si Chelito Caro.
Si Caro nahimong inilang coach sa Mindanao gumikan kay nakahagdaw na usab kini og ubay-ubay nga mga titulo sa ilang mga tournament ug labaw sa tanan makadala usab siya og mga dekalidad nga mga players ilabi na kadtong mga nagbasehan sa Sugbo.
Unya mogimok pa ang ekonomiya kay mapuno man ang mga hotel sa mga guest o mga teams. Unya makabenepisyo sab ang mga gagmayng patigayon.
* * *
Atong nahinabi sa makadiyot ang bag-o ug batan-ong mayor sa lungsod sa Alicia, Zamboanga Sibugay nga si Mayor Alvie Musa, Al-hadj.
Ang LGU sa Alicia maoy kaabag sa KSB Glass-Iligan City sa ilang pagsalmot sa maong tournament diin ang team gilangkuban sa mga Cebu-based players.
Kining Alicia gilangkuban og 27 ka barangays diin sa kinatibuk-an mokabat ngadto sa 40,000 kapin ang population. Usa kini ka 3rd class municipality sa probinsiya sa Zamboanga Sibugay nga may gilay-on nga 76.7 kilometros gikan sa lungsod sa Ipil.
Giangkon sa bag-ong napiling mayor nga first time pa gyud ni nila nga mosalmot og mga dagkong lega nga susama niini diin dekalidad usab ang mga kontra.
Gani grabi kaayo siyang nakaabiba sa unang duwa sa team diin gipukan sa Alicia ang BRT Basilan.
Bag-o pa man tuod siya sa puwesto isip pagka mayor, apan iyang gipasalig nga ubos sa iyang administrasyon, ang sports development maoy iyang hatagan og prayoridad.
Iyang gitug-an nga nagpadayon na ang construction sa ilang gym ug wa niya isalikway ang pagpahigayon usab og mga dagkong lega sa umaabot nga mga adlaw. Kini posibling malakip sa sports tourism program sa iyang pamunoan.
Ako nahinumdom, sa dihang giimbitar usab kita sa pikas habig sa Zamboanga nga mao ang sa Dapitan City, sakop sa Zamboanga del Norte.
Sama sa probinsiya sa Zamboanga Sibugay ang sports tourism usab ang ilang gipalambo.
Kon kini mapadayon, di nako masurprisa nga molutaw ug maila na unya ang lungsod sa Alicia.
Goodluck, Mayor Alvie.