Wa pa magkasinabut sila si Mayor Mike Rama ug ang mayoriya sa mga konsehal kalabut sa real property tax (RPT). Ang ilang wa pagkasinabut nagagumikan sa gipasar nga revised real property tax code ordinance nga gisupak sa mayor. Ang gihimo sa mga konsehal mao ang pagbuhis sa katunga sa fair market value (FMV) sa real property karong tuiga. Sumala sa nangamahan sa maong ordinansa nga si Konsehal Noel Wenceslao, chairman sa committee on budget and finance nga dako ra kaayo ang umento sa RPT kon tumanon ang giduso sa Local Finance Committee (LFC).
Nagtuo ang mayor nga kinahanglan nang kolektahon sa Siyudad ang buhis basi sa FMV karong tuiga tungod kay mao kini ang gipaabut sa mga kabus nga nagkinahanglan sa batakang serbisyo sa city hall. Tungod niini gi-veto ni Mayor Rama ang maong ordinansa.
Wa ko kasabut nganong wala matuman ang kagustohan sa mayor nga dugay na man kaayo kini nilang nasabutan alang igasto sa paghimo sa Cebu City nga Singapore-like. Abi to nako og wa nay problema kay napasar na man gani ang budget nga P51.4B tungod lagi sa maong programa sa mayor. Nganong nausab man ang baruganan sa mga konsehal bisan sa daghang mga caucus kalabut niini? Apan nganong dili man nila i-override ang veto sa mayor kon nagtuo sila nga sila maoy husto? Maghuwat na usab sila og revised tax rate nga iduso sa executive department. Unsa may mahitabo kon dili gayud usbon ni Mayor Rama ang iyang baruganan nga kinahanglan gayud nga kolektahon ang RPT basi a FMV karong tuiga? Ila pa ba kining isumiter sa public hearings?
Pag-usik sa panahon ug salapi sa mga magbubuhis kining maong paagi sa pagpasar og ordinansa kay inay nga magsweldo kita kanila aron daghang mga ordinansa ug resolusyon ang mapasar alang sa kaayuhan sa katawhan mababoy na man hinuon kita niining way pagsinabtanay sa mga pulitiko nga sama ra unta og partido.
Kon tinuod nga maluoy ang mga konsehal sa mga lumolupyo sa dakbayan nga nagbayad karon og RPT nga P10,000 matag tuig unya mobayad na og P300,000 kon tumanon ang kagustuhan ni Mayor Rama nganong dili man nila i-overide ang veto? Naglibug pa sila kon kinsa ang ilang tahuron ang mayor o ang pangindahay sa katawhan? (mannyrabacal1144@gmail.com)