Niadtong 2010, nihimo ko sa akong labing unang “long ride” atol sa Huwebes Santo sa Carcar City. Kini laging nagtuo ko nga sayon kaayo ang biseklita sikaran, nitangdo ko dihang gi-invite ko sa among photographer kaniadto nga si Allan Defensor.
Pastilan, di lalim ang mosikad og kapin sa 100 kilometers, padung ug balik, kon bag-o pa. Didto ko nakat-on sa pacing sa pagtindak ug pagginhawa. Kapoy man tuod kaayo, apan daghan ko og nakat-unan gikan ni Kuya Allan. Gitudloan sab diay ni siya sa iyang mga higalang professional cyclists nga nangapil og Marlboro Tour.
Ka usa dihang nanungas mi sa akong mga kauban sa MTB sa Manipis padung sa Transcentral Highway, dunay duha nga nanguyog namo nga di pa dugay sa sikad. Ang among target nga makauli na sa balay nahimong hapit alas 5 sa hapon inay alas 2 base sa una namong ride.
Nagsige na man mi og pahuway kay amo silang giagad.
Bisan atleta ka pa, di kapangandakan ang biking. Sa usa namo ka ride sa Cebu Folding Bike Society, dunay niapil nga varsity player sa basketball.
Sa iyang paghunong, diretso siyang niinom og tubig. Akong gisinggitan nga ayaw. Pastilan, nikalit lang og collapse. Amoang gitabang but naulian man siya diha pa sa taxi, wa siya nipadala og dayon sa ospital. Human niadto, nauwaw tingali, wa na nikuyog.
SAYON HUNA-HUNAON
Sa bisan unsa nga sports, anam-anam ang kataas sa oras sa practice. Mao ni ang akong gihimo sa akong mga anak nga hilig og biking. Anam-anam sab ang pagpasikad.
Hinuon, lahi ang mga batan-on ug edaran na. Nagsugod ko sa mountain biking sa nag edad ko og 40 anyos. Not too late alang nako kay ganahan man kaayo ko og biseklita.
Apan wa ko nagpadala sa excitement kay nakita nako nga kinahanglan diay nga andamon ang lawas. Sayon ra tuod tan-awon, apan lisod buhaton.
Bisan gani ang naa sa mountain biking nga dugay na, nagkinahanglan og igong panahon ug kondisyon kon naundang. Bisan og duha lang ka mga semana, need nimo nga mopakondisyon aron di makalitan ang lawas.
Kuyaw baya nga ipugos ang lawas kon duna kay gipamati.
MAKAMATAY
Daghan na ang nadisgrasya, nakabsan sa kinabuhi tungod kay gipugos ang lawas. Kon di man gani, dunay sakit nga wa lang mahibaw-i. Mga atleta pa gani.
Dihang naospital ang akong amahan niadtong 2011, sa tupad nga kwarto dunay 23 anyos nga gisulod sab sa intensive care unit (ICU).
Hapit siya namatay sa heart failure. Sa akong pagpangutana niya, unsay nakaingon. Gisultihan siya sa doktor nga sports drink.
Akong nahibaw-an nga mga walo ka botelya ang iyang imnon matag adlaw aron di siya dukaon sa pagduwa og billiard.
Nganong kuyaw ang sports drink? Taas diay kaayo ni og caffeine content.
Busa di angay abusohan sa pag-inom labina kada adlaw.
Mag-amping ta kanunay. Di ipugos ang lawas. Anam-anam ang pagsikad, di mangambisyon og diretso aron lang ingnon nga kusgan.