Balay sa barangay konsehal gipusil og makadaghan sa gikatahapang drug pusher nga wanted sa alas 4:45 sa kaadlawon sa Sabado, Pebrero 18, sa Sitio Dakong Dalan, Brgy. Jampang, lungsod sa Argao.
Walay kabutangan sa kalisang ni brgy. konsehal Marmehelbert Rizon Delos Reyes, 48, minyo, ug sa iyang pamilya atol sa hitabo.
Si Police Staff Sgt. John Mark Canonigo sa Argao Police Station nga nahinabi sa Superbalita Cebu, niingon nga positibong giila sa konsehal ang suspek nga si Airon Cris D. Mancao, usa ka drug pusher, dunay pending warrant of arrest sa kaso sa ilegal nga drugas, taga Sitio Hayunan, Brgy. Jampang.
Matud ni Canonigo nga lima ka mga sunodsunod nga buto sa armas ang iyang nabati.
Ang bala nanglapos sa bongbong sa ilang balay human sa mga pagpamusil. Human sa mga buto, ang konsehal nilili sa bintana sa ilang balay ug nakita niya ang suspek nga naglakaw nga nibiya sa ilang balay nga naglakaw lang padung sa usa ka motorsiklo dayon nipadagan.
Si Canonigo niingon nga ang motibo hayan kasuko sa suspek dihang siya nadakpan sa buy-bust sa Argao Police pipila ka bulan, diin si De Los Reyes maoy nisaksi. Ang mga sakop sa Argao Police nagpadayon sa ilang manhunt operation batok sa suspek.