Adunay pito ka mga major port sa lalawigan sa Sugbo nga gusto ni Cebu Governor Gwendolyn Garcia nga patutukan ug mas pahugtan ang seguridad aron mapugngan ang pagpalusot sa ilegal nga drugas agi niini.
Atol sa tigom nga gipangulohan sa gobernador sa One Cebu Inter-Agency Interdiction Task Force (OC-IAITF) niadtong Biyernes, Pebrero 17 sa Kapitolyo, nauyonan nga monitoron ang mga pantalan.
Nalakip sa ginganlan sa task force ang pantalan sa dakbayan sa Bogo ug Toledo, lungsod sa Dalaguete, Santander, Tabuelan, San Remigio, Santa Fe, ug mga isla sa Camotes.
Subay sa pahibawo sa Cebu Provincial Information Office, gitumbok ang maong mga lugar gumikan sa matag adlaw nga pagdagsa sa nagkadaiyang mga pasahero sa dapit.
Si Garcia nagkanayon nga kinahanglan nga pahibaw-on sa mga sakop sa OC-IAITF ang mga mayor sa naasoyng mga lokalidad aron makatabang kini sa pagbantay.
Aron mas mapalapdan ang pagbantay, gisugyot ni Garcia nga moumol og duha ka mga grupo sa task force diin lahi ang magbantay sa Mactan Cebu International Airport (MCIA) ug lain usab ang magbantay sa mga pantalan sa lalawigan.
Gawas sa grupo, gitahasan usab sa gobernador nga moapil ug motabang og abag ang mga sakop sa Bureau of Quarantine, Office for Transportation Security, Naval Forces Central, Tactical Operations Wing Central sa Philippine Air Force (PAF), ug airport police.