Gimandoan pag-usab ni Cebu Governor Gwendolyn Garcia ang Philippine Mining Service Corporation (PMSC) sa pagtuman sa iyang kaniadto nga kamandoan nga iyang giluwatan sa pagpahunong sa pagproseso, pagbaligya ug pag transport sa dolomite, mga mineral deposits ug uban pang quarry resources tungod sa giingong mga kalapasan niini sa pagpamuhis ug environmental laws.
Si Garcia niluwat sa iyang Executive Order No. 7 sa Pebrero 17, 2023 aron pahinumdoman ang PMSC nga gidili gihapon ang pag operate sa Barangay Pugalo, lungsod sa Alcoy sa habatang Sugbo tungod sa kapakyas niini sa pagbayad sa buhis ngadto sa Kagamhanan sa Probinsya sa Sugbo subay sa Provincial Ordinance No. 2008 - 10.
Sa gipahibaw sa Cebu Provincial Information Office, gilagdaan ni Garcia ang EO uban sa presensya sa kapulisan ug mga sakop sa Philippine Coast Guard (PCG).
Ubos sa Section 124 sa Ordinance No. 2008-10, nalatid nga ang mga kompaniya kinahanglang mobayad og buhis nga 10 porsiyento sa local fair market value matag cubic meter sa quarry resources ubos sa hurisdiksyon sa Probinsiya sa Sugbo.
Gikataho nga ang PMSC namaligya og dinugmok nga dolomite, ingon man bas ug graba.
Ubos sa Tax Revenue Code sa Probinsya, ang mga kompaniya nga nagnegosyo sa lalawigan kinahanglang makakuha og governor’s permit, nga wala pa gihimo sa PMSC.
Subay niini, gitahasan ni Garcia ang kapulisan, Armed Forces of the Philippines (AFP) ug ang PCG sa pagpatuman sa maong lagda pagsiguro nga walay barko o uban pang sea vessel nga makaguwa sa pantalan kon walay saktong mga dokumento.
Gipugngan usab ang Mines and Geosciences Bureau sa pag-isyu og permit ngadto sa PMSC ingon man ang pagkanselar sa kasamtangang mga permit nga una nang giluwatan alang sa kompaniya samtang gipatuman ang EO.