Usa ka lalaki nga gituohang may deperensya sa pangisip nikatkat sa usa ka telecommunications tower sa lungsod sa Medellin ug giingong dunay plano nga moambak taliwa sa kusog nga huros sa hangin ug nasinating pag-uwan sa lugar sa Sabado, Pebrero 18, 2023.
Dali nga na-rescue sa mga sakop sa Municipal Disaster Risk Reduction and Management Office (MDRRMO) sa lungsod sa Medellin inubanan sa presensya sa kapulisan ug Medellin Mayor Benjun Mondigo ang lalaki nga hingkod og panuigon, kinsang ngan gipugngan, human nisuway sa pag ambak sa tower sa Barangay Poblacion sa maong lungsod.
Asoy sa MDRRM office nga pasado alas 11:00 sa buntag nakadawat sila og pahibalo gikan sa usa ka concerned citizen kabahin sa nakita nga lalaki nga nikatkat sa tower.
Ang pagkatkat sa lalaki nakita pa sa drone sa usa ka Rhajeev Gulane nga nagpasalamat usab sa daling pagresponde sa local government unit (LGU).
Saysay sa MDRRMO nga wala nitubag ang lalaki sa mga pangutana, apan nihulga pa siya nga moambak kon pugngan ug salbaron siya.
Ang biktima luwas nga gidala na sa Rural Health Unit sa lungsod alang sa dugang pagsusi.