Gidunggab di mokiha tungod sa iyang gugma

Bisan ang kutsilyo nitaop sa iyang tiyan, lalaki nipasaylo sa iyang kapuyo nga nidunggab kaniya sa mga alas 2 sa kaadlawon Sabado, Pebrero 18, 2023 sa Brgy. Ibabao Estancia, dakbayan sa Mandaue.

Di siya makaako maghuna-huna nga ang babaye nga natingban sa iyang gugma mabilanggo.

Tinuod nga mga ngan sa biktima ug suspek gipugngan ning mantalaan.

Si Jun,33, dunay kapuyo, technician sa usa ka kompaniya, samdan sa walang bahin sa tiyan ug kamot human dunggaba sa iyang kapuyo nga si Jen, 23, atol sa ilang panaglalis.

Si Patrolman Ruben Ursal sa Police Station 1 sa Mandaue City Police Office (MCPO) nga nahinabi sa Superbalita Cebu, nagkanayon nga si Jun wala na mopasaka og kaso batok sa suspek.

Sumala pa ni Orsal nga nagselos ang biktima sa laing lalaki hinungdan sa away nila ni Jen.

Wala na gibutyag ni Jun sa kapulisan kon kinsa ang mao nga lalaki.

Gumikan sa pagselos sa biktima, nahitabo ang ilang grabing panaglalis ni Jen.

Sa pag-init sa lalis, iyang natamparusan ang iyang kapuyo.

Sa kalagot sa suspek, giingong nikuha kini og kutsilyo ug gidunggab si Jun.

Ang mga silingan nga nakamata sa kagubot maoy nipahibalo sa kapulisan.

Gidali sab nila sa pagdala ang biktima sa Mandaue District Hospital samtang si Jen ilang gidakop.

“Dili na mopasakag kaso kay pinangga kaayo niya ang babaye. Gipasaylo naman daw niya,” dugang ni Ursal.

Sumala ni Ursal nga ang suspek maoy nagbantay sa biktima sa tambalanan human kini nila gibuhian.

Ang suspek nipadayag nga wala siyay intensyon nga patyon ang kapuyo.

Nakalitan lang siya dihang gitamparos sa biktima.

“Lambing naman hinuon kaayo human nadunggaban. Di daw siya makaako nga mapriso kay love kaayo niya (ang babaye),” sumala ni Ursal.