Moabot sa kapin sa 28 ka kilo sa shabu, ingon man marijuana, ang gisunog atol sa gipahigayong dangerous drugs destruction sa Cebu Cosmopolitan Funeral Homes thermal chamber sa dan Junquera, Dakbayan sa Sugbo sa Sabado, Pebrero 18,2023.
Ang kalihukan gipangulohan sa Philippine Drug Enforcement Agency (PDEA 7) ug gisaksihan sa Police Regional Office (PRO 7), Department of Justice (DOJ) ug uban pa’ng mga ahensiya sa kagamhanan.
Ang drugas nga balor og P190 milyunes nasakmit sa PDEA 7 sa ilang anti drug operations ug gimando na sa hukmanan nga sunogon. Naglakip kini sa 16 ka kilo nga nasakmit gikan sa usa ka langyaw nga niagi sa Mactan Cebu International Airport (MCIA). Matud ni PDEA 7 Regional Director Jigger Montallana nga ang maong kalihukan maoy labing unang higayon karong tuiga ubos sa iyang pagduma isip pangu sa PDEA sa Central Visayas.