Usa sa pagpatunhay sa transparency ug accountability sa kalihokan sa City Government, sakop sa konseho sa dakbayan sa Sugbo gusto nga i-live stream ang tanang proseso sa biddings.
Si Konsehal Rey Gealon nisang-at og ordinansahon niadtong Biyernes, Pebrero 17, 2023, nga mag-require sa Bids and Awards Committee (BAC) nga i-institutionalize ang livestreaming sa proseso sa bidding alang sa pagpalit sa mga butang, proyekto sa imprastraktura, ug serbisyo sa pagkonsulta.
Si Gealon, kinsa usa ka abogado, niingon sa iyang ordinansahon nga ang transparency ug accountability maoy importanteng haligi sa maayong pagdumala, ug ang pag-abli sa mga pultahan sa BAC ngadto sa kinatibuk-ang publiko maghatag og kasiguroan nga ang pundo sa publiko nagasto og maayo.
Ang ordinansahon nga giulohan og “Live Streaming of the Bidding Process of The Bids and Awards Committee of the City of Cebu” nakaangkla usab sa Seal of Good Local Governance Act of 2019 nga nagdasig ug nag-ila sa maayong performance sa local government units sa transparency ug accountability sa paggamit sa mga pundo sa publiko.
Ang Republic Act No. 9184 o ang Government Procurement Reform Act nag-ingon nga ang matag procuring entity, kinahanglang magtukod og usa ka BAC alang sa pagpalit niini, “it should be composed of at least five members and shall be chaired by at least a third ranking permanent official of the procuring entidad gawas sa ulo niini.”
Gipadayag usab sa balaudnon nga ang tanan nga pagpalit sa gobyerno himuon pinaagi sa kompetisyon nga bidding gawas sa ubang mga alternatibong pamaagi nga gihatag sa parehas nga balaod.
Ang proseso sa bidding nagtumong sa mga hugna sa pre-procurement conference, ang pre-bid conference, ug ang pag-abli sa mga bid nga ipahigayon sa BAC sa Siyudad.
Sa proposed ordinance, ang tanang proseso sa bidding adunay audio-video broadcast sa opisyal nga internet platform sa City Government nga magtugot sa viewers sa pagtan-aw ug pagpaminaw sa proseso sa real time.
“The live streaming shall cover all modes of procurement recognized under the Government Procurement Act, such as emergency procurement and other alternative modes,” tipik sa proposed ordinance.
Alang sa pagpatuman sa ordinansa, P1 milyon ang budget nga igahin apan ang BAC tugotan nga makapangayo og dugang pondo.
Si Atty. Collin Rosell, secretary ni Mayor Michael Rama ug chairman sa BAC for infrastructure, nitug-an sa SunStar Cebu Dominggo, Pebrero 19, nga bisan unsa nga makapasiugda sa transparency ug accountability, welcome sa kasamtangang administrasyon.
Dugang ni Rosell nga kinahanglan pa niyang tan-awon ang kopya sa proposed ordinance ug susihon kon nahisubay ba kini sa procurement law sa gobyerno aron dugang komento bahin niini.
Ang proseso sa bidding sa siyudad nagsunod sa polisiya sa gobyerno bahin sa procurement law apan, dason ni Rosell, ang BAC kanunay nga bukas alang sa mga inobasyon sa pagpatunhay sa transparency ug accountability sa City Hall.
Samtang, si Minority Floor Leader Konsehal Nestor Archival Sr. nitug-an sa SunStar Cebu niadtong Dominggo nga ang sugyot ni Gealon usa ka butang nga seguradong iyang suportahan tungod kay kini makapalambo sa transparency sa City Government.
Si Gealon nagtrabaho na sa City Hall sa wala pa mapili isip konsehal niadtong 2022 ug sigurado nga nasayod siya sa mga pamaagi sa bidding, dugang niya.
Matod ni Archival, hangtod karon wala pa siyay nadunggan nga anomaliya kon hisgutan ang bidding process ubos sa bag-ong administrasyon ni Rama.
“Kung ma-live stream na, wala na kaayo (anomalies), Kung naa man gani at least nakasabot ta kung unsay nahitabo. Para nako that is a very good ordinance,” matod ni Archival. (IRT)