Na-trap sa kalapokan ang lima ka sugarol sa tigbakay ug napusasan, alas 12:40 sa udto sa Dominggo, Pebrero 19, 2023, sa Purok 2, Barangay Esperanza, lungsod sa Aloguinsan.
Gitanggong sila si Antonio Alejado, 53, minyo, ug construction worker; Alfredo Ragodos Digamos, 54, minyo, ug mag-uuma; Jemar Juban Ponpon, 31, minyo, ug mag-uuma; Orencio Yana Bensing, 47; ug Eusebio Irisari Solis, 57, ug usa ka construction worker. Sila pulos mga molupyo sa nahisgotang dapit.
Sa operasyon, nakuha sa kapulisan ang duha ka mga manok inugtatari, duha ka buwang, ug P740 cash.
Si Police Staff Sgt. Melchorito Suelton sa Aloguinsan Police Station nga nahinabi sa Superbalita Cebu, niingon nga ang ilang mga intelligence officer ug kauban nakadawat sa report kabahin sa tigbakayan sa nahisgutang lugar.
Sa pagsusi sa kapulisan, naabtan nila ang daghang sugarol nga nagsultada sa ilang mga manok. Dali nilang gihamagan ug nahitabo ang ginukdanay.
Nakaambak sa sapa ang ubang sugarol apan ang uban didto natugpa sa kalapokan, hinungdan nga sila nadakpan.
“Nipilit sila sa lapok mao nga wala na makadagan..” matud ni Suelton.
Dugang sa pulis, wala magdahom ang lima ka sugarol nga madakpan apan gidimalas sila kay na-trap sa kalapokan.
Kasong kalapasan sa Presidential Decree 1602 o illegal cockfighting ang giandam batok sa mga dinakpan.