Sugod niadtong Pebrero 9, 2023, ang Globe postpaid customers mahimong magsugod sa pagkumpirma sa pagparehistro sa ilang mga SIM sa usa ka sayon nga pamaagi.
Aron makompleto ang rehistrasyon sa SIM sa ilang mga kustomer nga postpaid, ang Globe karon nagsugod na sa pagpadala og SMS nga naghangyo kanila sa pagkumpirma sa ilang mga detalye pinaagi lang sa pag-text sa SIMREG ngadto sa 8080.
Pinaagi sa pagpadala sa SMS, ang tagsa-tagsa ka Globe Postpaid ug Platinum customers mokompirmar sa Globe sa tibuok ngalan, petsa sa pagkatawo, sekso, address ug pruweba sa identipikasyon nga ila nang gisumite sa Globe atol sa postpaid application.
Kini nga lakang nagsilbi nga gipahayag nga kumpirmasyon sa mga kustomer alang sa Globe nga magamit ang ilang mga detalye karon alang sa pagparehistro sa SIM, subay sa balaod.
“We have made it very easy for our valued Postpaid customers to complete their SIM Registration. With just one text, they will be compliant with the SIM Registration law. With this step, we hope to reach more of our customers and get them to register,” matud ni Darius Delgado, Head sa Globe Consumer Mobile Business.
Alang sa mga prepaid nga kustomer, ang rehistrasyon nagpabiling bukas 24/7 sa Globe SIM registration website, https://new.globe.com.ph/simreg.
Ang Globe nagsugod na usab sa paglusad og mga assisted registration sites sa tibuok nasud aron sa paghatag og tabang sa mga senior citizen, persons with disabilities, buntis nga babaye, tiggamitan sa basic o feature phones ug bisan kinsa nga nagkinahanglan og suporta aron marehistro ang ilang mga SIM.
Subling nanawagan ang Globe sa tanang mga kustomer niini nga magparehistro sa ilang SIMS sa dili pa ang Abril 26, 2023 nga deadline aron malikayan ang SIM deactivation.
Adunay gibanabanang 86.7 milyunes ka SIM users sa Globe network.
Aron masayod og dugang bahin sa Globe ug ang proseso sa pagparehistro sa SIM, palihog bisitaha ang www.globe.com.ph.