Duha ang nangaangol human gidaro sa usa ka multicab kansang drayber nakatulog samtang nagmaneho sa alas 12:15 sa udto sa Lunes, Pebrero 20, 2023 sa national road sa Brgy. Owak, lungsod sa Asturias, Sugbo.
Usa sa duha ang drayber nga giilang si Alfredo Tanggol, 81, driver sa Suzuki mini van, taga Looc Sur, Brgy. Poblacion sa mao nga lungsod.
Si Police Master Sgt. Ronald Duran, hepe sa Asturias Police Station nga nahinabi sa Superbalita Cebu, nagkanayon nga ang multicab nidaro sa bingkahan nga gipanag-iya ni Isa Portoso Saludar, 53, minyo, nagpuyo sa dapit.
Iya usab nga nadasmagan si Lolita Abordo Grijaldo, 68, minyo, nagpuyo sab sa dapit.
Human niini, nadasmagan ang Toyota Vios nga gi-park nga gipanag-iya ni Arnold Trocio Cuyos, 41, minyo.
Sumala ni Duran nga si Tanggol gikan sa lungsod ug padulong na mopauli sa ilang balay sakay ang iyang pamilya.
Apan gikatahong nakatulog samtang nagmaniho sa multicab.
Sa pag-abot sa nahisgutang lugar, iyang gidaro ang tindahan sa bingka ug sunod nga naigo si Grijaldo nga naglakaw.
Tungod sa kusogkusog nga dagan nalakip sa pagdaro ang awto nga Vios.
Si Grijaldo nga gikataho nga nakaangkon og bali sa lawas gidali sa pagdala sa tambalanan sa lungsod sa Balamban.
Lakip sa naangol ug nadala sa ospital mao si Tanggol.
“Wala na daw siya nakabantay, nakatulog man. Nakamata dihang milugapak, nidasmag na sa tindahan, sa pedestrian, ug awto,” dugang ni Duran.
Gibutyag ni Duran nga si Grijaldo nabalian og bukog sa lawas.
Giandam na nila ang tukmang kaso batok kang Tanggol.