Diputado: Kaguliyang sa mga abogado sa Bohol

Diputado: Kaguliyang sa mga abogado sa Bohol

Nagubot ang mga abogado sa Bohol karon tungod sa tagna-tagna nga niresulta human nagpagawas og initials si Willy Ramasola sa mga ngalan sa mga abogado nga matud pa, nangurakot pinaagi sa paggama og desisyon sa mga kaso nga nasang-at sa usa ka korte sa Bohol.

Matod pa sa nakakita sa Facebook account ni Ramasola, kinsa man kaha ang maong mga abogado nga iyang gibatikos nga mga kurakot?

Ang uban sab nakaingon nga unsa kahay buhaton sa mga abogado sa Bohol karon nga giklaro man ni Ramasola nga adunay nagpabadlong nga mga abogado sa Bohol?

* * *

Nagsugod ang gumonhap sa dihang gibatikos ni Ramasola ang usa ka huwes sa Bohol nga matod pa niya, nagnegusyo o nagpabayad sa iyang mga desisyon aron makakwarta.

Wala man tuod hinganli ni Ramasola ang maong huwes, apan makita ang nawong ug mailhan ang maong huwes sanglit mogawas ra man gihapon ang iyang ngalan, hasta nawong, sa giplastar nga mga hulagway ni Ramasola.

Imbes maghulat sa reaksiyon sa mga huwes, nagpagawas dayon og “pahinumdom” ang mga opisyal sa IBP-Bohol nga nag-awhag kang Ramasola nga hinayhinayan ang iyang batikos ug modangop sa “proper forum” kon aduna man gani huwes nga nagpabadlong, dili kay lakbit lang batikoson ang mga huwes sa iyang Facebook account.

Imbes mohilom ug mosanong sa “hangyo” sa mga opisyal sa IBP-Bohol, gitirahan na hinuon ni Ramasola ang pipila ka mga abogado sa Bohol nga, matod pa niya, nangurakot pinaagi sa pagsulat sa desisyon sa maong huwes human bayari.

Gipun-an pa ni Ramasola ang iyang batikos pinaagi sa pagbutang sa “initials” sa ngalan sa mga abogado nga matod pa, nagtrabaho kanhi sa Provincial Legal Office sa Bohol.

Sa mga grupo sa mga abogado nga aktibong nanglaban sa Bohol ug sa mga empleyado sa Kapitolyo, dali ra kaayo nila matuhog ang mga ngalan nga gipasabot ni Ramasola.

Buot ipasabot, dali ra kaayo mahibaw-an kon kinsa gyod ang gi-target nga mga abogado sa post niini.

* * *

Nagpaabot ang katawhan karon kon unsay buhaton sa mga opisyal sa IBP-Bohol human sa tirada ni Ramasola, dili lang sa maong huwes kondili hangtod sa mga, matod pa, kurakot nga mga miyembro sa IBP-Bohol.

Kon ilang pasagdan ang maong birada ni Ramasola, daghan ang magtuo nga basin nagsulti siya sa tinuod ug tinuod gyod nga sila kurakot.

Pero kon ilang tubagon, unsaon man pod nila pagtubag nga mga initial man lang ang gibutang unya mogawas nga igo lang sila nga mobalibad nga dili tinuod.

Sa pagka-karon, dili pa mahibaw-an kon unsa gyod ang buhaton sa mga opisyal sa IBP-Bohol.

Hinuon, daghan ang natingala.

Ngano kaha nga mga opisyal man sa IBP-Bohol ang mitubag sa batikos ni Ramasola nga huwes sa Bohol man unta ang iyang giatake? Matod pa, dili ba nga ang angay unta nga motubag sa maong batikos ang mga huwes kay apektado gyod silang tanan.

Kaugalingon nga kabubut-on ba sa mga opisyal sa IBP-Bohol ang pagtubag ni Ramasola o adunay mihangyo kanila nga tubagon ang batikos ni Ramasola?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph